मुंबई (इंडिया दर्पण वृत्तसेवा) – सरकारी किंवा खासगी क्षेत्रातील कोणतीही बँक असो, ग्राहकांचे हित पर्यायाने, देशाचा आर्थिक विकास हेच त्यांचे उद्दिष्ट असावे, असा नियम तथा धोरण आहे. मात्र काही बँका या नियमांचे पालन करण्यास टाळाटाळ करतात. त्यामुळे रिझर्व बँकेला कारवाई करावी लागते. अशाच प्रकारे ग्राहकांचे हित लक्षात घेण्यास टाळाटाळ केल्याने महाराष्ट्रातील एका सहकारी क्षेत्रातील मोठ्या बँकेविरुद्ध कारवाई करण्यात आली. यामुळे सहकार क्षेत्रातील बँकांमध्ये खळबळ उडाली आहे.
आरबीआयने भारतीय रिझर्व्ह बँकेनं सोमवारी मुंबईत मुख्यालय असलेल्या रायगड सहकारी बँकेवर अनेक निर्बंध लादले असल्याची घोषणा केली. या निर्बंधांमध्ये ग्राहकांना पैसे काढण्यावर निर्बंध आणण्यात आले असून आता जास्तीतजास्त १५ हजार रूपयेच काढता येणार आहे. याचाच अर्थ ग्राहकांना आता त्यांच्या खात्यातून यापेक्षा अधिक रक्कम काढता येणार नाही. बँकेची आर्थिक स्थिती पाहता रिझर्व्ह बँकेनं हा निर्णय घेतला आहे.
यापुढे सदर बँकेतून एका ग्राहकाला एकूण १५ हजार रूपयांपेक्षा अधिक रक्कम काढण्याची परवानगी देण्यात येणार नाही. त्यांची एकापेक्षा अधिक करंट अथवा सेव्हिंग खाती असली तरी अधिक रक्कम काढता येणार नाही, असेही रिझर्व्ह बँकेने स्पष्ट केले आहे. याशिवाय रिझर्व्ह बँकेनं नव्या कर्जांचं वाटप करण्यावरही निर्बंध घातले आहे. रायगड सहकारी बँकेला रिझर्व्ह बँकेच्या पूर्व परवानगीशिवाय कोणतंही कर्ज देण्याची, गुंतवणूक करण्याची आणि ग्रहकांकडून नव्यानं जमा रक्कम स्वीकारण्याची परवानगी नसेल, असेही रिझर्व्ह बँकेनं म्हटल आहे.
रायगड सरकारी बँकेवर हे निर्बंध पुढील सहा महिन्यांसाठी लागू असतील. दरम्यान, हे निर्बंध बँकेचा परवाना रद्द करण्याच्या रूपात नसतील असंही रिझर्व्ह बँकेनं म्हटलं आहे. बँक आपली आर्थिक परिस्थिती सुधरेपर्यंत निर्बंधांसह बँकिंग व्यवसाय सुरू ठेवेल, तसंच परिस्थितीनुरूप रिझर्व्ह बँक पुढे आपल्या निर्देशांमध्ये बदल करण्यावर विचार करू शकेल, असेही स्पष्ट करण्यात आले आहे.
दरम्यान, श्री छत्रपती राजर्षि शाहू अर्बन को-ऑपरेटिव्ह बँक लिमिटेडला ६ लाख रूपयांचा दंड ठोठावल्याची माहिती रिझर्व्ह बँकेनं एका निवेदनाद्वारे दिली. मार्गदर्शक सूचनांचं उल्लंघन केल्याप्रकरणी बँकेवर ही कारवाई करण्यात आली आहे. केंद्रीय रिझव्‍‌र्ह बँकेच्या (आरबीआय ) कडक धोरणानंतरही काही बँकांकडून सातत्याने नियमांचे उल्लंघन केले जात आहे. याच कारणामुळे आरबीआयने अनेक बँकांवर दंडही ठोठावला आहे. अनेकदा रिझर्व्ह बँक ऑफ इंडिया (RBI) नियमांचे उल्लंघन केल्याबद्दल बँकांवर कारवाई करते.
Reserve Bank of India Imposed Restriction Cooperative Bank RBI Raigad Cooperative Bank
