नाशिक (इंडिया दर्पण वृत्तसेवा) – नाशिकचे गुणवान रंगकर्मी आज सिनेमा, मालिका, वेब सिरीज आणि व्यावसायिक रंगभूमी गाजवत आहे. त्यातील एक आघाडीचे नाव अनिता दाते केळकर. “वाळवी” हा सिनेमा आणि नंतर “नवा गाडी नवं राज्य” मालिकेत रमाच्या भूमिकेतून गंमत आणणारी ही अभिनेत्री मालिकेतील भूमिका संपल्यानंतर कुठल्या भूमिकेत दिसणार याची उत्सुकता तिच्या चाहत्यांमध्ये होती.
आता अनिता “किरकोळ नवरे” या नव्या कोऱ्या नाटकाद्वारे दीर्घकाळानंतर रंगभूमीवर येत आहे. पती-पत्नीच्या नात्याबद्दल बोलणारं हे विनोदी नाटक आहे. नात्यातील असुरक्षितता आणि चिरंतन प्रेमबद्दल बोलणारं हे नाटक सागर देशमुख यांनी लिहिले आहे, दिग्दर्शनही त्यांनीच केले आहे. नव्या पिढीतला आश्वासक अभिनेता पुष्कराज चिरपुटकर तसेच सागर देशमुख हे अनिता बरोबर प्रमुख भूमिकेत दिसणार आहेत.
मुंबई येथे शुभारंभ करून रविवार १३ ऑगस्ट दुपारी १ वाजता नाशिक येथील शुभारंभ महाकवी कालिदास कलामंदिर येथे होत आहे. नाशिककर आपल्या लाडक्या अभिनेत्रीला कौतुकाची थाप देण्यासाठी नक्कीच उपस्थित राहतील असा विश्वास नाटकाचे निर्माते दिनू पेडणेकर, अभिजीत देशपांडे आणि राहुल कर्णिक यांनी व्यक्त केला.
Renowned actress Anita Date’s new drama ‘Kirkol Navare’ launched in Nashik on Sunday
