इंडिया दर्पण ऑनलाईन डेस्क
दिल्लीच्या मुख्यमंत्री रेखा गुप्ता यांच्यावर हल्ला करणा-या व्यक्तीचे फोटो समोर आले आहे. हल्ला करणार हा व्यक्ती गुजराथ मधील राजकोट येथील निवासी असून त्यांचे नाव राजेश भाई खिमजी भाई सकारिया आहे. तो ४१ वर्षाचा आहे. या आरोपीच्या आईने सांगितले की, भटक्या कुत्र्यांच्या सर्वोच्च न्यायालयाच्या निर्णयानंतर तो दिल्लीला गेला होता. त्याचे मानसिक संतुलनही बिघडले आहे. तो प्राणीप्रेमी आहे. तो रिक्षाचालक परिवारामधील आहे.
राजेश खिमजीच्या शेजा-याने सांगितले की, मी त्याला गेल्या ५-६ वर्षांपासून ओळखतो. तो एक साधा आणि उदार माणूस आहे ज्याला प्राण्यांवर प्रेम आहे.
दिल्लीत आज कॅम्प ऑफिसमध्ये जनता दरबार घेत असतांना मुख्यमंत्री रेखा गुप्ता यांच्यावर राजेशने हा हल्ला केला. त्यानंतर पोलिसांनी त्याला अटक करुन कसून चौकशी केली. या घटनेमुळे जनता दरबारमध्ये काही काळ गोंधळ उडाला. हल्ल्याचे कारण मात्र अद्याप स्पष्ट नाही. जनता दरबार सुरु असतांना हल्ला करणारा राजेश निवेदन घेऊन मुख्यमंत्री रेखा गुप्ता यांच्याकडे आला. त्यांनी निवेदन दिले. त्यानंतर तो अचानक आक्रमक झाला. त्याने रेखा गुप्ता यांना शिवीगाळ करत त्यांच्या कानाखाली मारली. या व्यक्तीने त्यांचे केस पकडून मारहाण केली.
या घटनेनंतर आम आदमी पार्टीच्या माजी मुख्यमंत्री आतिशी यांनी प्रतिक्रिया दिली आहे. त्या म्हणाल्या की, मुख्यमंत्री रेखा गुप्ता यांच्यावरील हल्ला अत्यंत निषेधार्ह आहे. लोकशाहीमध्ये मतभेद आणि निषेधाला स्थान असते, परंतु हिंसाचाराला स्थान नसते. दिल्ली पोलिस दोषींवर कठोर कारवाई करतील अशी आशा आहे. मुख्यमंत्री पूर्णपणे सुरक्षित असतील अशी आशा आहे.
तर दिल्ली काँग्रेसचे प्रमुख देवेंदर यादव यांनी सांगितले की, हे खूप दुर्दैवी आहे. मुख्यमंत्री संपूर्ण दिल्लीचे नेतृत्व करतात आणि मला वाटते की अशा घटनांचा जितका निषेध केला जाईल तितका तो कमीच आहे. परंतु ही घटना महिलांच्या सुरक्षिततेचाही पर्दाफाश करते. जर दिल्लीचा मुख्यमंत्री सुरक्षित नसेल तर सामान्य माणूस किंवा सामान्य महिला कशी सुरक्षित राहू शकेल?
