नाशिक (इंडिया दर्पण वृत्तसेवा) – शिवजयंती निमित्त छत्रपती शिवाजी महाराजांची जगातील सर्वात लहान पोर्ट्रेट रांगोळी चांदवडचे कलाशिक्षक देविदास शिवराम हिरे यांनी साकारली आहे. हिरे हे शिक्षण मंडळ भगूर, संचालित चांदवड तालुक्यातील भाटगाव येथे नूतन माध्यमिक विद्यालयात कलाशिक्षक आहेत. शिवजयंती निमित्त महाराजांना काहीतरी वेगळ्या पद्धतीने अभिवादन करावे या प्रेरणेने ( २.५ सें. मी × २.५ सें. मी.) आकारात ड्रॉईंग पेपर वर हातांच्या बोटांच्या साहाय्याने ५७ मिनिटात ही अनोखी शिवरायांची प्रतिमा रंगोळीमध्ये साकारली आहे. इतक्या लहान आकारात छत्रपती शिवाजी महाराजांची रांगोळी साकारणारे हिरे हे पहिले कलाकार आहेत.
विविध पुरस्काराने सन्मानित देव हिरे या नावाने प्रसिद्ध असलेले सर नेहमीच विविध विषयांवर आपल्या फलक रेखाटन, रांगोळी,चित्र,स्केच या कलेतून विविध प्रयोग करत असतात. या रेकॉर्ड ब्रेक, अद्भुत सर्वात लहान पोर्ट्रेट रांगोळीने त्यांच्या प्रयोगात अजून एक भर घातली आहे.
