फसवणूक प्रकरणः राजस्थानचे मुख्यमंत्री अशोक गेहलोत यांच्या पुत्राने केला हा खुलासा

इंडिया दर्पण ऑनलाईन डेस्क – आमिष दाखवून नाशिकमधील युवकासह व्यावसायिकांना तब्बल सहा कोटी, ८० लाखांना गंडवण्यात आल्याची घटना उघडकीस आली आहे. राजस्थान सरकारच्या पर्यटन विभागाच्या ‘ई-टॉयलेट’ जाहिरातीच्या ई-टेंडरींगच्या कामात गुंतवणूक केल्यास कोट्यावधीचा नफा होऊ शकतो, असे ते आमिष होते. याप्रकरणी गुजरातमधील १५ संशयितांविरुद्ध गंगापूर पोलिस ठाण्यात गुन्हा नोंदवण्यात आला आहे. विशेष म्हणजे, राजस्थानचे मुख्यमंत्री अशोक गेहलोत यांचे पुत्र वैभव गेहलोत यांचा त्यात समावेश असल्याचा आरोप सुशिल पाटील यांनी केला आहे. तसेच, यासंदर्भात सक्तवसुली संचालनालयाकडे (ईडी) तक्रार करणार असल्याचे पाटील यांनी सांगितले आहे. दरम्यान, याप्रकरणी आता वैभव गेहलोत यांनी खुलासा केला आहे.

पोलिसांनी दिलेल्या माहितीनुसार, जानेवारी २०१८ ते २०२० दरम्यान ही घटना घडली. सुशिल भालचंद्र पाटील (वय ३३, रा. ओमकार बंगला, गितांजली को-अॉप सोसायटी, वाघ गुरुजी शाळेसमोर, पंपींग स्टेशन, गंगापूर रोड) यांना या प्रकरणात गंडवण्यात आले आहे.
सुशिल पाटील यांनी दिलेल्या तक्रारीनुसार, संशयितांनी संगनमत करून विश्वास संपादन केला. राजस्थान सरकारच्या नावाने ई-टॉयलेट पर्यटन विभागाचे जाहिरातीसाठी ई-टेंडरचे संपूर्ण राज्याचे कामकाज समाविष्ट आहे. त्यात गुंतवणूक केल्यास कोट्यावधीचा नफा मिळू शकतो. असे खोटे आश्वासन देत गुंतवणूक करण्यास प्रवृत्त केले.
सुशिल पाटील व संंबंधित व्यावसायिकांकडून २०१८ ते २०२० दरम्यान तीन कोटी, ९३ लाख, ५४ हजार, ७८८ रुपये आरटीजीएसद्वारे ट्रान्सफर करून घेतले. तसेच उर्वरीत रक्कम रोख घेतली. या रक्कमेचा अपहार झाल्याचे तक्रारीत नमूद केले आहे.
याप्रकरणी वैभव गेहलोत म्हणाले की, ज्या फसवणूक प्रकरणात माझे नाव गोवण्यात आले आहे त्याबद्दल मला काहीच माहिती नाही. माझा त्याच्याशी काहीही संबंध नाही. जशी जशी निवडणूक जवळ येत आहे तसे तसे खोटे आरोप आणि कारस्थाने वाढत आहेत.

https://twitter.com/VaibhavGehlot80/status/1505166207263010816?s=20&t=WodmDNthh4Ki06f3IME6Vg

संशयितांची नावे अशी
सुशिल भालचंद्र पाटील यांनी दिलेल्या तक्रारीनुसार, सचिन पुरुषोत्तमभाई वेलेरा (रा. भावकुंज सोसायटी, अहमदाबाद, गुजरात), वैभव गहलोत (सरदारपुरा, जोधपूर), किशन कांतेलिया, सरदारसिंग चौहान, ‘नीडल क्राफ्ट’ चा अधिकृत व्यक्ती, प्रविणसिंग चौहान, सुहास सुरेंद्रभाई माकवाल, निरवभाई महेशभाई विर्माभट, बिश्वरंजन मोहंती, राजबिरसिंग शेखावत, प्रग्येशकुमार विनोदचंद्र प्रकाश, संजयकुमार देसाई, सावनकुमार पारनेर, सौ. रिशिता शहा, विराज पांचाल यांच्याविरुद्ध भादंवि कायदा कलम ४२०, ४०६, ४६८, ४७१, ५०४, ५०६, ३४ अन्वये गुन्हा दाखल केला आहे. उपनिरीक्षक संजय भिसे तपास करत आहेत.