मुंबई (इंडिया दर्पण वृत्तसेवा) – मुंबईतील बेस्टच्या पतपेढीसाठी होणा-या निवडणुकीत शिवसेना ठाकरे गट आणि मनसेची युती झाल्यानंतर या निवडणुकीत लिटमस टेस्ट म्हणून बघितले जात होते. पण, या निवडणुकीत ही टेस्ट फेल झाली. या निवडणुकीत ठाकरे गटाने २१ पैकी १९ तर मनसे २ जागा उत्कर्ष पॅनलतर्फे लढवल्या पण, यातील एकही जागा या पॅनलला जिंकता आली नाही. तर दुसरीकडे फारश्या चर्चेत नसलेल्या शशांक राव यांच्या पॅनलने १४ जागा जिंकत पतसंस्थेवर वर्चस्व मिळवले. तर महायुतीच्या सहकार पॅनलला ७ जागा मिळाल्या. त्यानंतर आता मनसेचे अध्यक्ष राज ठाकरे यांची प्रतिक्रिया समोर आली आहे.
राज ठाकरे म्हणाले की, त्या छोट्या निवडणुका आहेत. या लहान गोष्टी आहेत. कुठल्या निवडणुकांबद्दल तुम्ही बोलता? मला त्याबद्दल काहीच माहित नाही. त्या स्थानिक निवडणुका आहेत. तुम्हाला रोज आग लावायला हवं असे राज ठाकरे म्हणाले. आज राज ठाकरे यांनी मुख्यमंत्री देवेंद्र फडणवीस यांची भेट घेतली. या भेटीनंतर त्यांनी पत्रकारांशी संवाद साधला. त्यावेळी त्यांनी बेस्ट पतसंस्थेच्या निवडणुकींवरही प्रतिक्रिया दिली.
अशी झाली बेस्टची निवडणूक
गेल्या चार वर्षापासून ही निवडणूक रखडली होती. या निवडणुकीत ठाकरे बंधूंनी युती केल्यामुळे या निवडणुकीकडे सर्वांचे लक्ष होते. महानगरपालिकेच्या निवडणुकी अगोदर या दोन्ही ठाकरे बंधुची लिटमस टेस्ट असल्याचे बोलले जात होते. पण, या टेस्टमध्ये ठाकरे बंधुचे पॅनल फेल ठरले. या निवडणुकीत शिवसेनेची बेस्ट कामगार सेना आणि महाराष्ट्र नवनिर्माण बेस्ट कर्मचारी सेनेची युती झाली. त्यांनी प्रणि उत्कर्ष पॅनल तयार करुन त्यांच्या पोस्टरवर ठाकरे ब्रॅण्ड असे लिहले होते. तर दुसरीकडे आमदार प्रसाद लाड आणि प्रवीण दरेकर यांची भाजप प्रणित श्रमिक उत्कर्ष सभा, निलेश राणे यांची समर्थ बेस्ट कामगार संघटना तर शिंदेच्या किरण पावसरकर यांची राष्ट्रीय कर्मचारी सेना यांनी एकत्रित मिळून सहकार समृध्दी पॅनल निवडणुकीत उतरवले होते. तर बेस्ट वर्कर्सं युनियन पुरस्कृत शशांक राव पॅनल यांनी २१ उमेदवार रिंगणात उतरवले होते.
बेस्ट एम्प्लॅाईज को ऑपरेटिव्ह क्रेडिट सोसायटी निकाल
शशांक राव पॅनल -१४
महायुती पॅनल सहकार पॅनल – ६ (भाजप ४, शिंदे गट २)
मनसे – शिवसेना उत्कर्ष पॅनल -०
एससी- एसटी युनियन – १
