राज्यात या जिल्ह्यात पुढील ३ दिवस मध्यम जोरदार पावसाची शक्यता…बघा, हवामानतज्ञांचा अंदाज

माणिकराव खुळे, हवामानतज्ञ
….
पुढील ३ दिवसात पावसाचा जोर अधिक कोठे असेल?
आज गुरुवार २२ ते शनिवार दि. २४ मे पर्यंतच्या तीन दिवसात मुंबईसह ठाणे, पालघर, रायगड, रत्नागिरी, सिंधुदुर्ग, नंदुरबार, धुळे, जळगांव, नाशिक, नगर, पुणे, सातारा, सांगली, कोल्हापूर, सोलापूर, छ.सं.नगर, जालना, बीड, धाराशिव, लातूर, परभणी या ठिकाणी दुपारनंतर मध्यम ते जोरदार अवकाळी पावसाची शक्यता जाणवते. रत्नागिरी, सिंधुदुर्ग, सातारा, सांगली, कोल्हापूर, सोलापूर, धाराशिव, लातूर, परभणी या जिल्ह्यात तर या जोरदार पावसाचा प्रभाव सोमवार २६ मे पर्यंत ही राहू शकतो. या कालावधीत विदर्भात मात्र तुरळक ठिकाणी किरकोळ पावसाचीच शक्यता जाणवते.

या ३ दिवसातील पावसाचा जोर कशामुळे?
अरबी समुद्रात कर्नाटक कि. पट्टी समोर तयार झालेल्या हवेच्या कमी दाब क्षेत्रातून, आवर्ती चक्रीय वाऱ्यांची निर्मिती व त्याचे उत्तरेकडे होणारे मार्गक्रमण यातून पावसाचा जोर वाढण्याची शक्यता आहे.

महाराष्ट्रात अवकाळीचे हे वातावरण कधी पर्यंत असेल?
एकंदरीत जरी शनिवार ३१ मे पर्यन्त पावसाचे वातावरण असले तरी गुरुवार २९ मे पासून महाराष्ट्रात अवकाळीचे वातावरण काहीसे निवळण्याची शक्यता जाणवते. अर्थात मान्सूचे केरळातील आगमनाची तारीखच याची दिशा ठरवेल.

अवकाळी पावसाच्या ओलीवर आगाप पेरणीसाठी धाडस करावे काय?
अवकाळी पावसाची स्थिती सध्या जरी चांगली वाटत असली तरी, प्रत्यक्षात मान्सूनचे महाराष्ट्रात आगमन केंव्हा होते आणि आगमनानंतर त्याच्या वितरणाची स्थिती व मान्सूनच्या पावसावर मिळालेल्या ओलीची खोली यावर हे ठरवता येईल. त्यामुळे महाराष्ट्रात या पावसामुळे केवळ पेरणीपूर्व शेतीच्या मशागतीचाच विचार व्हावा, असे वाटते. परंतु कपाशी व टोमॅटो लागवडी करु इच्छिणाऱ्या शेतकऱ्यांनी, एखाद्या-दोन सिंचनाच्या पाण्याची व्यवस्था असेल तरच लागवडीचा विचार करावा, असे वाटते.
माणिकराव खुळे
Meteorologist (Retd)
IMD पुणे