इंडिया दर्पण ऑनलाईन डेस्क
मुंबईः राहुल गांधी लाल रंगाचे संविधान दाखवून शहरी नक्षलवादाला प्रोत्साहन देतात. देशात एकप्रकारे अराजकता परसवण्याचे काम राहुल आणि ‘इंडिया’ आघाडीचे नेते करत आहेत, अशी टीका उपमुख्यमंत्री देवेंद्र फडणवीस यांनी केली होती. त्यांच्या टीकेला राहुल यांनी ‘एक्स’ या समाज माध्यमावर पोस्ट करत उत्तर दिले. महाराष्ट्रातील भाजपच्या माजी मुख्यमंत्र्यांच्या मते, बाबासाहेबांचे संविधान दाखवून जात जनगणनेसाठी आवाज उठवणे, ही नक्षलवादी कल्पना आहे. भाजपची ही विचारसरणी म्हणजे संविधानाचे निर्माते डॉ. बाबासाहेब आंबेडकर यांचा अपमान आहे, असे राहुल म्हणाले.
लोकसभा निवडणुकीत महाराष्ट्रातील जनतेने संविधानासाठी लढून महाविकास आघाडीला मोठा विजय मिळवून दिला होता. त्यामुळे महाराष्ट्रातील जनता हा बाबासाहेबांचा अपमान कधीही सहन करणार नाही. लोकसभेप्रमाणेच विधानसभेतही ते काँग्रेस आणि महाविकास आघाडीला समर्थन देतील आणि आपल्या संविधानावरील प्रत्येक हल्ल्याला पूर्ण ताकदीने उत्तर देऊन त्याचे रक्षण करतील, अशी प्रतिक्रिया त्यांनी दिली.
राहुल यांच्या नागपूरमधील संविधान सभेबाबत बोलताना फडणवीस यांनी महाविकास आघाडीला लक्ष्य केले होते. ‘भारत जोडो’ हा समूह तयार करण्यात आला आहे. या समूहामध्ये अनेक संघटना अतिशय डाव्या विचारांच्या आहेत. त्यांच्या कामाची पद्धत, ध्येय धोरणे ही अराजक पसरवणारी यंत्रणा आहे. एकीकडे राहुल एक पुस्तक आपल्याला दाखवतात. संविधानाचा सन्मानच केला पाहिजे; पण लाल संविधानच का? कोणाला तुम्ही इशारा देताय? लाल पुस्तक दाखवून कोणाला इशारा देताय? संविधानाचा अर्थ असतो ऑर्डर. तुम्ही अराजक पसरवत आहात,’ असे फडणवीस म्हणाले होते. संविधान आणि ‘भारत जोडो’ याच्या नावाखाली अराजकता पसरवणाऱ्यांना एकत्र करून समाजात द्वेष निर्माण करण्याचा प्रयत्न होत आहे. शहरी नक्षलवादाचा हा प्रयत्न आहे. शहरी नक्षलवादाचा हाच अर्थ आहे की लोकांची मने कलुषित करायची. त्यांच्यामध्ये अराजकतेचे एक रोपण करायचे, जेणेकरून देशातील संस्था, यंत्रणा यावरून त्यांचा विश्वास उडेल. यामुळे देशाच्या एकतेला आणि एकात्मकतेला धोका निर्माण होईल, अशी टीकाही त्यांनी केली होती.
