पुणे (इंडिया दर्पण वृत्तसेवा) – पिंपरी-चिंचवडमध्ये एक स्टेडियम असताना दुसरे स्टेडियम कशाला हवे, असा वाद सध्या रंगत आहे. गहुंजे आणि मोशी या दोन ठिकाणांवरून हा वाद आहे. यासंदर्भात कोट्यवधीची उधळण कशासाठी केली जात आहे, असा प्रश्नही राष्ट्रवादी काँग्रेसने उपस्थित केला आहे.
पुणे जिल्ह्यात पुणे, गहुंजे व बारामती अश्या तीन ठिकाणांवर क्रिकेट स्टेडियम आहेत. पिंपरी-चिंचवड शहरालगत गहुंजे येथे आंतरराष्ट्रीय दर्जाचे क्रिकेट स्टेडियम असताना मोशी येथे नव्याने क्रिकेट स्टेडियम बांधण्याचा घाट कोणाच्या सांगण्यावरून घातला जात आहे, असा प्रश्न स्थानिक राष्ट्रवादी काँग्रेसच्या नेत्यांनी विचारला आहे. यामागे राज्यातील सत्तेत असणारे खोके सरकार व त्यांचे स्थानिक पदाधिकारी हे अंतर्गत आर्थिक तडजोडी करून प्रशासनाला हाताशी धरून शहरातील जनतेच्या कररुपाने जमा झालेल्या कोट्यावधी रुपयांची उधळपट्टी करत असल्याचा संशय नाना काटे यांनी व्यक्त केला आहे.
तसेच नव्याने विकसित होणारे क्रिकेट स्टेडियम बीओटी, पीपीई, खासगी की पालिकेच्या निधीतून करायचे हे अद्याप निश्‍चित झालेले नाही. त्यामुळे त्यांच्या सल्लागारासाठी कोट्यवधीची उधळपट्टी आणि क्रिकेट स्टेडियमचा घातलेला घाट तात्काळ रद्द करा, अन्यथा राष्ट्रवादी काँग्रेस जनआंदोलन उभारेल, असा इशारा राष्ट्रवादीचे नेते नाना काटे यांनी दिला आहे. मोशीतील प्रभाग क्रमांक तीन येथील आरक्षण क्र.१/२०४ येथे आंतरराष्ट्रीय क्रिकेट स्टेडियम उभारणे. या कामासाठी सन २०२३-२४ च्या अंदाजपत्रकात ४०० कोटी रुपयांस प्रशासकीय मान्यता देण्यात आली आहे. त्यानुसार महापालिकेने स्टेडियम उभारण्यासाठी हालचाली सुरू केल्या आहेत. यामध्ये सल्लागार म्हणून नियुक्ती देण्यास आयुक्त सिंह यांनी स्थायी समितीची मान्यता दिली आहे.
सल्लागाराची नियुक्ती
पिंपरी-चिंचवड महापालिकेच्या वतीने मोशी येथे आंतरराष्ट्रीय दर्जाचे क्रिकेट स्टेडियम उभारण्यासाठी ४०० कोटींचा खर्च गृहीत धरून स्टेडियम उभारण्याच्या कामासाठी सल्लागार नेमण्यास आयुक्त शेखर सिंह यांनी मान्यता दिली आहे. या स्टेडियमच्या निर्माणावरून राष्ट्रवादी आक्रमक असले तरीही त्यांच्या वरिष्ठांनी अद्याप सरकारच्या विरोधात आवाज उठवलेला नाही.
