पुणे (इंडिया दर्पण वृत्तसेवा) – अजित पवार गटाचे नेते बाबा सिद्धीकी हत्या प्रकरणात आणखी एकाला अटक करण्यात आली आहे. मुंबई पोलिसांच्या गुन्हे शाखेने दिलेल्या माहितीनुसार, गौरव विलास अप्पुने (वय २३) नावाच्या व्यक्तीला पुण्यातून अटक करण्यात आली आहे. त्याचा या प्रकरणात सहभाग असल्याच्या घटनेला दुजोरा देण्यात आला. त्याला हत्येची पूर्ण माहिती असल्याचे तपासात निष्पन्न झाले आहे. या प्रकरणातील ही १६वी अटक आहे.
गुन्हे शाखेच्या अधिकाऱ्यांनी सांगितले, की तपासादरम्यान हत्येचा कट रचण्यासाठी गौरव हा अनेकदा इतर आरोपींना भेटला होता. शूटर्सच्या पहिल्या बॅचच्या तो संपर्कात होता. याआधी बाबा सिद्दीकी यांना मारण्याची सुपारी ज्यांनी दिली होती, त्यांच्या तो संपर्कात होता. गुन्हे शाखेचे पथक गौरवला न्यायालयात हजर करणार आहे. या प्रकरणाचा पोलिस अधिक तपास करत आहेत.
बाबा सिद्धीकी यांची १२ ऑक्टोबर रोजी मुंबईतील वांद्रे येथे मुलगा झिशान यांच्या कार्यालयाबाहेर गोळ्या झाडून हत्या करण्यात आली. या हत्येची जबाबदारी लॉरेन्स बिश्नोई गँगने घेतली आहे. सिद्धीकी यांचे अभिनेता सलमान खानशी जवळचे संबंध असल्याने त्यांची हत्या करण्यात आली आहे. याच दरम्यान आता सिद्धीकी यांच्या हत्याकांडातील एका साक्षीदाराला पाच कोटींची खंडणी आणि धमकीचा फोन आला होता. साक्षीदाराने पोलिसांना सांगितले, की काही दिवसांपूर्वी त्याला एका अज्ञात व्यक्तीकडून धमकीचा फोन आला होता. त्यात पाच कोटी रुपयांची मागणी करण्यात आली होती. पैसे न दिल्यास जीवे मारण्याची धमकी फोन करणाऱ्याने दिली होती. पोलिस फोन करणाऱ्या व्यक्तीचा शोध घेत आहेत. या प्रकरणी आतापर्यंत अनेकांना अटक करण्यात आली आहे.
