पुणे (इंडिया दर्पण वृत्तसेवा) – संरक्षण संशोधन आणि विकास संस्थेचे (डीआरडीओ) वरिष्ठ शास्त्रज्ञ डॉ. प्रदीप कुरुलकर यांना कोर्टाने दिलासा प्रदान केला आहे. पाकिस्तानी गुप्तचर यंत्रणेला गोपनीय माहिती पुरविल्याप्रकरणी डॉ. कुरुलकर यांची पॉलिग्राफ आणि आवाजाची चाचणी करण्याबाबत (व्हॉइस लेअर ॲनॅलिसिस) दहशतवाद विरोधी पथकाकडून (एटीएस) दाखल करण्यात आलेला अर्ज कोर्टाने फेटाळला आहे. त्यामुळे एटीएसला जबरदस्त धक्का बसला आहे.
कुरुलकरचे वकील ॲड. ऋषिकेश गानू यांनी एटीएसच्या अर्जास विरोध केला होता. कुरुलकरच्या परवानगीशिवाय व्हॉइस लेअर ॲनॅलिसिस चाचणी, पॉलिग्राफ चाचणी करणे संशयित आरोपीच्या अधिकारांच्या विरुद्ध आहे. कुरुलकरकडून जप्त करण्यात आलेला लॅपटॉप, मोबाइल संचाचे तांत्रिक विश्लेषण करण्यात आले होते. तांत्रिक विश्लेषण करून डीआरडीओच्या समितीने याबाबतची कागदपत्रे एटीएसकडे सोपविली होती, असे ॲड. गानू यांनी सांगितले होते. दोन्ही बाजूंचा युक्तिवाद ऐकून न्यायालयाने एटीएसने दाखल केलेला अर्ज फेटाळून लावला.
एटीएसला धक्का कुरुलकर तपासात सहकार्य करत नसल्याचे एटीएसच्या वकिलांनी न्यायालयात सांगितले होते. कुरुलकर बऱ्याच गोष्टी लपविण्याचा प्रयत्न करत आहे. त्यासाठी व्हॉईस लेअर सायकोलॉजिकल ॲनॅलिसिस आणि पॉलिग्राफ चाचणी करायची आहे, असे एटीएसने दाखल केलेल्या अर्जात म्हटले होते. संबंधित अर्ज न्यायालयाने फेटाळून लावल्याने एटीएसला धक्का बसला आहे.
ते परत मिळवायचाय
अतिरिक्त सत्र न्यायाधीश एस. बी. कचरे यांनी या प्रकरणी आदेश दिले. कुरुलकर तपासात सहकार्य करत नसल्याचे सरकारी वकील ॲड. विजय फरगडे यांनी न्यायालयात नमूद केले होते. कुरुलकर याने मोबाइल संचातील काही विदा (डाटा) नष्ट करण्याचा प्रयत्न केला आहे. तो परत मिळवायचा आहे. कुरुलकर बऱ्याच गोष्टी लपविण्याचा प्रयत्न करत आहे. त्यासाठी व्हॉईस लेअर सायकोलाॅजिकल ॲनॅलिसिस चाचणी करायची आहे. पॉलिग्राफ चाचणीसाठी आरोपीची परवानगी आवश्यक असते. मात्र, व्हाॅइस लेअर चाचणीसाठी आरोपीची परवानगी गरजेची नसते. असे ॲड. फरगडे यांनी युक्तिवादात सांगितले होते.
Pune ATS Pradip Kurulkar Honey Trap DRDO Court Investigation
