इंडिया दर्पण ऑनलाईन डेस्क
पुणेः दारुच्या नशेत असलेल्या एका १७ वर्षीय अल्पवयीन मुलाने स्कॉर्पिओ गाडीने तीन वाहनांना धडक दिली. या दुर्घटनेत रिक्षा चालकाचा मृत्यू झाला असून दोन जण गंभीर जखमी झाले आहेत. हा मुलगा लष्करातील सैनिकाचा मुलगा असल्याची माहिती आहे.
पुणे-नाशिक महामार्गावर या अल्पवयीन मुलाने भरधाव वेगाने स्कॉर्पिओ गाडी चालवत रिक्षा, स्कूटर, आणि मोटरसायकलला धडक दिली. त्यानंतर गाडी दुभाजकावर जाऊन आदळली. रिक्षा चालक अमोल कांबळे (वय २७) यांचा मृत्यू झाला असून स्कूटर आणि मोटरसायकलवरील दोघे गंभीर जखमी झाले आहेत.
पोलिस निरीक्षक पंकज महाजन यांनी दिलेल्या माहितीनुसार, अल्पवयीन चालक पुण्यातील एका अभियांत्रिकी महाविद्यालयात शिक्षण घेत आहे. त्याने मद्यपान करून आपल्या मित्राची एसयूव्ही गाडी भोसरी येथून नाशिक फाट्यापर्यंत भरधाव वेगाने नेली. गाडीवरील नियंत्रण सुटल्याने हा भीषण अपघात झाला. अपघातानंतर पोलिस घटनास्थळी दाखल झाले. त्यांनी अल्पवयीन चालकाला ताब्यात घेतले असून जखमींना तातडीने रुग्णालयात दाखल केले आहे. घटनेचा अधिक तपास सुरू आहे.
