इंडिया दर्पण ऑनलाईन डेस्क – भाजपच्या नेत्या नुपूर शर्माने पैगंबर मोहम्मद यांच्यावर केलेल्या वक्तव्याचे तीव्र पडसाद देशाच्या विविध भागात उमटत आहेत. गेल्या आठवड्यात कानपूरमध्ये भीषण हिंसाचार झाल्यानंतर आज देशाच्या विविध भागात जोरदार निदर्शने झाली. शेकडो नागरिक रस्त्यावर उतरले आणि त्यांनी नुपूरसह तिच्या वक्तव्याचा जाहीर निषेध केला.
उत्तर प्रदेशमध्ये प्रयागराज आणि सहारनपूर वगळता अन्य भागात कमी-अधिक प्रमाणात शांतता होती, परंतु देशातील इतर राज्यांमध्ये निदर्शने झाली. त्याचे पहिले चित्र दिल्लीतील जामा मशिदीतून आले, जेथे मोठ्या संख्येने लोकांनी शुक्रवारच्या नमाजानंतर घोषणाबाजी करण्यास सुरुवात केली. त्यांच्या हातात नुपूर शर्मा आणि नवीन जिंदाल यांची छायाचित्रे असलेली पोस्टर्स होती. नुपूर शर्मा आणि जिंदाल यांच्यावर कठोर कारवाई करावी, अशी त्यांची मागणी होती. मशिदीच्या शाही इमामाने मात्र निदर्शनाशी कोणताही संबंध असल्याचा इन्कार केला.
उत्तर प्रदेशातील सहारनपूर आणि प्रयागराजमध्येही मोठ्या संख्येने लोक रस्त्यावर उतरले, कानपूरसारखीच परिस्थिती राहिली. मोठ्या संख्येने रस्त्यावर उतरलेल्या लोकांनी प्रयागराजमध्ये हिंसक निदर्शने केली आणि दगडफेकही सुरू केली. अरुंद रस्त्यावरून अधूनमधून दगडफेक सुरूच होती. या दगडफेकीत आयजीही जखमी झाले. याशिवाय लखनौ, फिरोजाबाद आणि कानपूर सारख्या शहरांमध्ये पोलीस अत्यंत सतर्क राहिले आणि त्यामुळे कोणताही गडबड होऊ शकली नाही. यूपीशिवाय बंगालमधील हावडा, झारखंडची राजधानी रांची येथे भीषण निदर्शने झाली आहेत. रांचीमध्येही आंदोलकांच्या हल्ल्यात अनेक पोलीस जखमी झाल्याचे वृत्त आहे. एवढेच नाही तर गुजरातमधील अहमदाबादसारख्या शहरातही रस्त्यावर प्रचंड गर्दी दिसून आली.
कोलकाता येथील पार्क सर्कस परिसर आणि हैदराबादमधील चारमिनार येथेही मोठ्या संख्येने लोक रस्त्यावर उतरले होते. याशिवाय नुपूर शर्मा यांच्यावर कारवाई करण्याच्या मागणीसाठी काश्मीरच्या श्रीनगरमध्येही लोकांनी निदर्शने केली. महाराष्ट्रातील नवी मुंबईतही मोठ्या संख्येने महिला रस्त्यावर उतरल्या आणि नुपूर शर्मा यांच्यावर कठोर कारवाईची मागणी केली. मात्र, कोणत्याही ठिकाणी परिस्थिती अनियंत्रित न झाल्याने प्रशासनाने परिस्थिती हाताळली, ही दिलासादायक बाब होती. यूपीमध्ये आधीच कडक बंदोबस्त होता आणि सकाळपासून ड्रोनच्या साह्याने पाळत ठेवली जात होती. त्याचबरोबर कोणत्याही प्रकारचा गडबड होऊ नये म्हणून मोठ्या प्रमाणात पोलीस बंदोबस्त रस्त्यांवर तैनात करण्यात आला होता.
शुक्रवारी निदर्शने होऊ शकतात, असा इशारा केंद्रीय गृहमंत्रालयाने सर्व राज्यांना आधीच जारी केल्याचे वृत्त आहे. विशेष म्हणजे, कानपूरमध्ये गेल्या आठवड्यात झालेल्या हिंसक निदर्शने आणि दगडफेकीनंतर पुढील शुक्रवारी परिस्थिती पुन्हा एकदा चिघळण्याची भीती व्यक्त केली जात होती. ही बाब आंतरराष्ट्रीय स्तरावरही चर्चेचा विषय बनली होती, हे विशेष. कतार, सौदी अरेबिया, इराण, मलेशिया, बहरीन, यूएईसह अनेक इस्लामिक देशांनी या मुद्द्यावर आक्षेप घेतला होता. यावर अनेक देशांनी भारताच्या राजदूतांनाही बोलावले होते.
खरं तर, सोशल मीडियावर काही दिवसांपासून एक पोस्टर मोठ्या प्रमाणावर व्हायरल होत आहे, ज्यामध्ये पैगंबर मोहम्मद यांच्यावरील वक्तव्याच्या निषेधार्थ 10 जून रोजी भारत बंदची चर्चा होती. ही घोषणा कोणत्याही मोठ्या संघटनेची नसून, सोशल मीडियावर व्हायरल झालेल्या या पोस्टमुळे देशातील सर्व शहरांमध्ये एवढ्या मोठ्या संख्येने लोक जमा झाल्याचे मानले जात आहे.
