नवी दिल्ली (इंडिया दर्पण वृत्तसेवा) – काही दिवसांपूर्वी नवीन संसद भवनाच्या उद्घाटन सोहळ्याप्रसंगी राष्ट्रपती द्रौपदी मुर्मू यांना जाणीवपूर्वक बोलाविण्यात आले नव्हते, अशी टीका होत असतानाच आता त्यांना जगन्नाथ मंदिराच्या गाभाऱ्याबाहेर ठेवण्याचा प्रकार घडल्याची माहिती पुढे आली आहे. यासंदर्भात योगेंद्र यादव यांनी फोटो पोस्ट केला असून त्यामुळे खळबळ माजली आहे.
दिलीप मंडल यांचं ट्वीट रिट्विट करत योगेंद्र यादव यांनी यावर आपलं मत व्यक्त केलं आहे. या संपूर्ण प्रकरणाचं सत्य समोर आलं पाहिजे. राष्ट्रपतींसह जातीभेद झाला असेल तर संपूर्ण देशाचा अपमान आणि गंभीर अपराध आहे असं योगेंद्र यादव यांनी म्हटलं आहे. पत्रकार दिलीप मंडल यांनी याविषयीचा व्हिडीओ पोस्ट केला आहे. त्यांनी एएनआयचा व्हिडीओ ट्वीट करत म्हटलं आहे की आम्ही हे पाहिलं आहे की अश्विनी वैष्णव आणि धर्मेंद्र प्रधान यांनी जगन्नाथ मंदिराच्या गाभाऱ्यात जाऊन पूजा केली.
मग भारताच्या राष्ट्रपती द्रौपदी मुर्मू यांना गाभाऱ्याच्या बाहेर लावण्यात आलेल्या बॅरियरच्या बाहेर का उभं केलं गेलं आहे? त्यांना गाभाऱ्यात प्रवेश का दिला गेलेला नाही? धर्मेंद्र प्रधान आणि अश्विनी वैष्णव यांनी दिल्लीतल्या जगन्नाथ मंदिरातील मूर्तींना गाभाऱ्यात जाऊन स्पर्श केला आणि दर्शन घेतलं. त्याच मंदिरात राष्ट्रपती द्रौपदी मुर्मू यांनी मात्र बाहेरुन पूजा केली. ही बाब चिंताजनक आहे, या प्रकरणी स्पष्टीकरण दिलं गेलं पाहिजे तसंच पुजाऱ्यांना अटक केली गेली पाहिजे अशीही मागणी दिलीप मंडल यांनी केली आहे.
यादव यांनी उपस्थित केला प्रश्न
दिलीप मंडल यांचं हेच ट्वीट योगेंद्र यादव यांनी ट्वीट करत राष्ट्रपतींना बाहेर का उभं केलं गेलं? असा प्रश्न विचारला आहे. तसंच या संपूर्ण प्रकरणाच्या चौकशीची मागणी केली आहे. २० जून रोजी राष्ट्रपती द्रौपदी मुर्मू, धर्मेंद्र प्रधान आणि अश्विनी वैष्णव यांनी दिल्लीतल्या जगन्नाथ मंदिराला भेट दिली. त्याचवेळी हा प्रकार घडल्याचा आरोप होतो आहे.
