मुंबई (इंडिया दर्पण वृत्तसेवा)- शिवरायांचा अपमान करणा-या व इतिहास अभ्यासक इंद्रजीत सावंत यांना धमकी देणा-या प्रशांत कोरटकरला तेलंगणातून अटक करण्यात आली आहे. गृहविभागाच्या सूत्रांनी ही माहिती दिली. प्रशांत कोरकटकरने अटकपूर्व जामिनसाठी अर्ज केला होता. पण, न्यायालयाने तो फेटाळल्यानंतर कोरटकर सापडला आहे.
प्रशांत कोरटकर हा २५ फेब्रुवारीपासून फरार होता. त्याने छत्रपती शिवाजी महाराज आणि छत्रपती संभाजी महाराज यांच्यावर आक्षेपार्ह वक्तव्य केले होते. त्यानंतर तो नागपुरहून फऱार झाला होता. कोरटकरने अगोदर कोल्हापूर न्यायालयामध्ये जामिनसाठी अर्ज केला होता. कोल्हापूर न्यायालयाने अर्ज फेटाळल्यानंतर त्याने उच्च न्यायालयात धाव घेतली. पण, येथेही त्याला दिलासा मिळाला नाही.
इतिहास अभ्यासक इंद्रजीत सावंत यांना धमकी देणा-या आणि छत्रपती शिवाजी महाराजाबद्दल अपशब्द वापरणा-या प्रशांत कोरटकर विरुध्द कोल्हापूर येथे जुना राजवाडा पोलिस स्टेशनमध्ये गुन्हा दाखल करण्यात आला होता. गेल्या काही दिवसांपासून कोरटकर यांनी केलेल्या वक्तव्यामुळे राज्यात सर्वत्र संताप व्यक्त करण्यात येत आहे. मुख्यमंत्री देवेंद्र फडणवीस यांचे नाव घेऊन ही धमकी देण्यात आली होती. ही धमकी दिल्यानंतर कोरटकर फरार होता. पोलिसही त्याचा शोध घेत होते.
