मुंबई (इंडिया दर्पण वृत्तसेवा) – शिंदे व उद्धव ठाकरे गटातील शाब्दीक चकमक काही संपलेली नाही. उलट ती सातत्याने वाढतानाच दिसते. कुणीतरी नेता दुसऱ्याला डिवचतो आणि त्यानंतर महाभारत सुरू होते. आता शिंदे गटाचे आमदार संजय शिरसाट यांनी ठाकरे गटाच्या महिला नेत्याला डिवचले आणि त्यानंतर दोघांमध्ये शाब्दिक चकमक उडालेली आहे.
शिंदे गटाचे नेते संजय शिरसाट यांनी दोन दिवसांपूर्वी प्रियंका चतुर्वेदी यांना खासदारकीवरून डिवचले होते. त्याला आता प्रियंका चतुर्वेदी यांनी सडेतोड उत्तर दिले आहे. ज्यांनी ५० खोक्यांसाठी आपला आत्मा विकला त्यांनी मला गोष्टी सांगण्याची गरज नाही, या शब्दांत प्रियंका चतुर्वेदी यांना शिरसाट यांना सुनावले आहे. आदित्य ठाकरेंनी सौंदर्य पाहून चतुर्वेदींना उमेदवारी दिली, असे वक्तव्य आमदार संजय शिरसाट यांनी केले होते.
यावर ठाकरे गटाच्या नेत्या प्रियांका चतुर्वेदी म्हणाल्या की, ‘मी कशी दिसते आणि मी जिथे आहे तिथे का आहे, हे मला एका गद्दार व्यक्तीने सांगायची गरज नाही. ज्याने ५० खोक्यांसाठी आपला आत्मा आणि प्रामाणिकपणा विकला, त्याने तर बोलण्याची गरजच नाही.’ संजय शिरसाट यांनी त्यापूर्वी चतुर्वेदींवर विधान केले होते. ज्यांना सौंदर्य बघून राज्यसभेची उमेदवारी मिळाली, त्या आधी काँग्रेसमध्ये होत्या आणि आता आम्हाला निष्ठेचे धडे देत आहेत, अशी टीका त्यांनी केली होती.
कोण आहेत चतुर्वेदी?
संजय शिरसाट म्हणाले होते, ‘काल उद्धव ठाकरे यांची उत्तर भारतीयांची सभा झाली. या सभेत प्रियांका चतुर्वेदी या शिवसेनेवर भाषण करत होत्या. गद्दारांचे काहीतरी केले पाहिजे, असे वाक्य त्यांच्या भाषणात होते. चंद्रकांत खैरे यांनी त्यांच्याबद्दल ‘कोण आहेत चतुर्वेदी?’ असे म्हटले होते ते खरेच आहे.’
