जळगाव (इंडिया दर्पण वृत्तसेवा) – राष्ट्रवादी काँग्रेसचे नेते एकनाथ खडसे यांनी त्यांच्यावरील घोटाळ्याच्या आरोपाच्या अनुषंगाने उपमुख्यमंत्री देवेंद्र फडणवीस यांच्यावर थेट आरोप केला आहे. ‘मी मुख्यमंत्रीपदाच्या शर्यतीत होतो, त्यामुळे देवेंद्र फडणवीसांनी मला अडकवण्याचा प्रयत्न केला. मला बदनाम करण्याचा प्रयत्न केला. मी जमीनच खरेदी केली नाही. मग जमिनीच्या व्यवहारात काळे तोंड करण्याचा काय संबंध’, असे म्हणत नाथाभाऊंनी फडणवीस यांना लक्ष्य केले आहे.
गेल्या काही दिवसांपासून एकनाथ खडसे आणि देवेंद्र फडणवीस यांच्यात शाब्दिक चकमक सुरू आहे. नुकतेच एकनाथ खडसे आणि रक्षा खडसे यांनी फडणवीस यांच्या ताफ्याला काळे झेंडे दाखविले होते. त्यानंतर दोन्ही बाजूने एकमेकांवर आरोपाच्या फैरी झाडण्यात आल्या. दोघांमधील हे युद्ध अद्याप शमलेले नाही. फडणवीस यांनी केलेल्या टीकेला उततर देताना खडसे म्हणाले,‘देवेंद्र फडणवीसांनी काल माझ्यावर टीका केली. मला वाटतेय फडणवीस अलीकडच्या काळात थोडे नैराश्यात आहेत. लहान मुलांप्रमाणे ते बालिश टीका करायला लागले आहेत. मुख्यमंत्री स्तरावरचा माणूस आणि माजी मुख्यमंत्री असलेल्या माणसाने काय शब्द वापरावे, काय बोलू नये, हे समजायला हवं. अलीकडच्या काळात विचित्र स्थिती पाहायला मिळतेय. ते कधी समोरच्याला म्हणतात तुमचे सांगाडे बाहेर काढेन. तर कधी काहीही बोलतायत. अशाप्रकारे त्यांचे बोलणे आहे.’
तुम्हीच आरोप केलेले आमदार मंत्रिमंडळात
तोंड काळे करण्याच्या पलीकडे गेलेले काळेकुट्ट चेहरे तुमच्या शेजारी बसतात. त्यांच्यावर भ्रष्टाचार आणि गैरव्यवहाराचे आरोप तुम्हीच केले आहेत. आज ते तुमच्या मंत्रिमंडळात आहेत. ते तुमचे सहकारी आहेत. अशा भ्रष्ट लोकांना घेऊन तुम्ही मंत्रीमंडळ तयार केले आहे. यामध्ये अनेक आमदारही आहेत. त्यामुळे कुणी काळे तोडं केले किंवा कुणी हिरवे तोंड केले, असे म्हणण्यापेक्षा कापसाला भाव कधी देणार? हे सांगा, असेदेखील खडसे म्हणाले आहे.
