इंडिया दर्पण ऑनलाईन डेस्क – राज्याचे उपमुख्यमंत्री आणि महाराष्ट्राच्या राजकारणातील पॉवरफुल नेता म्हणून देवेंद्र फडणवीस ओळखले जातात. त्यांच्याशी बोलायची, अनेक गोष्टी जाणून घेण्याची सर्वांनाच उत्सुकता असते. नुकतेच ते ‘खुपते तिथे गुप्ते’ कार्यक्रमात आले होते. तेव्हा त्यांनी अनेक गोष्टी उघड केल्या.
उपमुख्यमंत्री देवेंद्र फडणवीस आणि अमृता फडणवीस हे राज्यातील महत्त्वाचे कपल आहे. हे दोघेही आपापल्या क्षेत्रातील दिग्गज आहेत. त्यांच्या क्षेत्रातील योगदानासाठी ते नेहमीच चर्चेत असतात. अमृता फडणवीसांना कलाक्षेत्राची आवड असून त्या उत्तम गायिका आणि समाजसेविकाही आहेत. अमृता फडणवीस कायमच त्यांचं मत ठामपणे मांडतात. नुकतंच देवेंद्र फडणवीसांनी त्यांच्या पत्नीच्या मोकळेपणाच्या वागण्यावर भाष्य केले आहे.
अवधूतच्या या प्रश्नावर फडणवीस म्हणतात, हे काही फार जमवावं लागतं, असं मला वाटत नाही. एकमेकांच्या भूमिका एकमेकांना क्लिअर असल्या की फार गोंधळ होत नाही. आम्ही पहिल्या दिवसापासूनच असं ठरवलं होतं की तिने तिचं जीवन जगायचं आणि मी माझं जीवन जगणार. व्यक्ती म्हणून तिची काही मतं आहेत. ती प्रत्येकवेळी मला पटतात असं नाही, पण तो तिचा अधिकार आहे. त्यामुळे मी तिला आडकाठी करत नाही, असे देवेंद्र फडणवीस म्हणाले.
फडणवीस म्हणाले की, तिची अनेक मतं मला पटत नाहीत. तिच्या अनेक कृतीदेखील मला पटत नाहीत. पण तो तिचा अधिकार आहे. जर तिला इतकं बेधडक वागायचं असेल तर हा त्रास सहन करावा लागेल. कारण आपल्याकडे अजूनही इतकं पुढारलेपण आलेलं नाही की, महिलांनी इतकी मोकळी मतं मांडावीत. राजकारण्यांना तर हे अजिबातच पचत नाही. तिची मतं मला पटत नाहीत. पण ती मतं मांडण्याचा तिला अधिकार आहे. तो मी कधीही हिरावून घेणार नाही”, असेही देवेंद्र फडणवीस म्हणाले.
