नवी दिल्ली (इंडिया दर्पण वृत्तसेवा) – महाराष्ट्राचे मुख्यमंत्री एकनाथ शिंदे यांनी आज केंद्रीय गृहमंत्री व सहकार मंत्री अमित शहा यांची त्यांच्या शासकीय निवासस्थानी सहकुटुंब सदिच्छा भेट घेतली. यावेळी श्री. शिंदे यांनी केंद्रीय गृहमंत्री श्री शहा यांना पुष्पगुच्छ आणि छत्रपती शिवाजी महाराज यांची अश्वारूढ प्रतिमा भेट दिली. या भेटीत श्री शिंदे त्यांचे वडील संभाजी शिंदे, सुविद्य पत्नी लता शिंदे, मुलगा खासदार डॉ. श्रीकांत शिंदे, त्यांची पत्नी वृषाली शिंदे नातु रूद्रांश यांच्या सोबत होते. याप्रसंगी श्री. शहा यांनी श्री. शिंदे यांच्या सोबत महाराष्ट्रासंबंधी विविध विषयांवर चर्चा केली.
राजकीय चर्चांना उधाण
एकनाथ शिंदे हे दोन दिवसातच पुन्हा दिल्ली दौऱ्यावर गेले आहेत. यावेळी ते सहकुटुंब दिल्लीत आहेत. शहा यांच्या या गाठीभेटी म्हणजे राज्यात लवकरच मोठ्या राजकीय घडामोडी घडणार असल्याचे संकेत असल्याचे बोलले जात आहे. त्यातच ठाकरे गटाचे खासदार संजय राऊत यांनी आज म्हटले आहे की, दोन्ही उपमुख्यमंत्री मिळून एकनाथ शिंदे यांचा करेक्ट कार्यक्रम करतील. तर राष्ट्रवादी काँग्रेसचे आमदार अमोल मिटकरी यांनी आज एक ट्विट केले आहे त्यात त्यांनी म्हटले आहे की, मी अजित अनंत पवार मुख्यमंत्री म्हणून शपथ घेतो की… या सर्व घडामोडींमुळे सध्या राजकीय जोरदार चर्चा रंगत आहेत. एकनाथ शिंदे हे मुख्यमंत्रीपदावरुन पायउतार होणार का, अशी चर्चाही सुरू आहे.
