मुंबई (इंडिया दर्पण वृत्तसेवा) – शिवसेनेत बंड करणाऱ्या एकनाथ शिंदे गटाला सोबत घेऊन राज्यात सरकार स्थापन करून उद्धव ठाकरेंना दणका देणाऱ्या भाजपने आता आपली भूमिका आणखी स्पष्ट केली आहे. मुंबईत दाखल झालेल्या अमित शहा यांनी तसे स्पष्ट संकेत दिले आहेत. आपल्या पाठीत खंजीर खुपसणाऱ्या उद्धव ठाकरेंना धडा शिकवण्याचे स्पष्ट आदेशच भाजप पदाधिकाऱ्यांच्या बैठकीत अमित शहा यांनी दिले आहेत. त्यामुळे आगामी काळात भाजप आणि उद्धव यांच्या नेतृत्वातील शिवसेनेत चांगलीच टफ फाईट बघायला मिळणार आहे.
शहा म्हणाले की, उद्धव ठाकरेंनी भाजपचा विश्वासघात केला असून त्यांना धडा शिकवण्याची गरज आहे. राजकारणात आपण सर्व काही सहन करू शकतो, परंतु फसवणूक सहन केली जाऊ शकत नाही, असेही शहांनी म्हटले आहे. शहांनी मुंबई मनपा निवडणुकीच्या तयारीचाही आढावा घेतला. ते म्हणाले की, मुंबई निवडणुकीत मिशन १५० चे टार्गेट कसे गाठता येईल, या आराखड्यावर काम करायला हवे. मुंबई ही देशातील सर्वात मोठी नागरी संस्था आहे आणि भाजप दीर्घ काळापासून ती ताब्यात घेण्याचा प्रयत्न करत आहे. यावेळी त्यांनी एकनाथ शिंदे यांच्यासह शिवसेनेला घेरण्याची तयारी चालवली आहे. एवढेच नाही तर काही भागात भाजपलाही राज ठाकरे यांच्यासोबत उतरायचे आहे. यातून शिवसेनेची मते तोडण्याचा त्यांचा डाव असल्याचे मानले जात आहे.
देवेंद्र फडणवीस आणि एकनाथ शिंदे यांनी राज ठाकरे यांची नुकतीच भेट घेतली. तेव्हापासून मुंबई मनपा निवडणुकीत राज ठाकरे भाजप आणि एकनाथ गटासोबत येण्याची शक्यता वर्तवली जात आहे. अमित शहा रविवारी संध्याकाळीच मुंबईत पोहोचले होते आणि आज सकाळी त्यांनी अनेक ठिकाणी गणेशपूजेला हजेरी लावली. यावेळी मुख्यमंत्री एकनाथ शिंदे, देवेंद्र फडणवीस यांच्यासह अनेक नेते त्यांच्यासोबत होते. ते दोन दिवस मुंबईत राहणार आहेत. एकनाथ शिंदे सरकार स्थापन झाल्यानंतर ते पहिल्यांदाच महाराष्ट्रात पोहोचले आहेत. ते भाजपशी संबंधित विषय आणि मुंबई मनपा निवडणुकीच्या तयारीवर चर्चा करणार असल्याचे मानले जात आहे. विशेषत: सत्तेतून हकालपट्टी करूनही पक्ष टिकवण्यासाठी धडपडणाऱ्या उद्धव ठाकरे यांच्यासाठी यामुळे तणाव वाढू शकतो.
भाजप आणि एकनाथ शिंदे गटातील एकी सध्या कोणत्या पातळीवर आहे. यावरूनही शहरात अनेक ठिकाणी शिंदे गटाच्या नेत्यांनी त्यांच्या स्वागतासाठी मोठमोठे बॅनर, पोस्टर लावले होते, हे यावरून समजू शकते. विशेषत: मातोश्रीजवळील परिसरात, वांद्रे पूर्व भागात मोठ्या प्रमाणात बॅनर लागले आहेत, त्याबाबत चर्चा सुरू झाली आहे. भाजपचे अंतर्गत सूत्र सांगतात, “शहांचं स्वागत करणारे बॅनर हे शिंदे गटाच्या रणनीतीचा भाग आहेत. अमित शहांबद्दल कृतज्ञता व्यक्त करण्याची एकनाथ शिंदे यांची ही पद्धत आहे. याशिवाय उद्धव ठाकरे गटाला आरसा दाखवण्याचाही प्रयत्न आहे.
Politics Amit Shah Mumbai Party Meet Direction
BJP Shivsena Uddhav Thackeray Strategy
