जळगाव (इंडिया दर्पण वृत्तसेवा) – आपल्या राज्यातील अनेक जिल्ह्यांमधील शेतकरी आगळेवेगळे प्रयोग राबवित उत्पन्न घेतात. पारंपरिक शेतीतील पिकाऐवजी तसेच नगदी पिकांमध्ये ऊस, कापूस, द्राक्ष या सारखी पिके घेण्याऐवजी काहीजण आता सफरचंद, शेवगा, काजू यासह अन्य फळबागा बागायती पिके घेऊ लागले आहेत. तरीही अनेक राजकीय नेते यांचे साखर कारखाने असल्याने त्यांच्या शेतामध्ये केवळ ऊसच पिकतो, असे म्हटले जाते. परंतु ‘नाथाभाऊ ‘ म्हणजेच राष्ट्रवादी काँग्रेसचे नेते एकनाथ खडसे मात्र याला अपवाद ठरले आहेत. त्यांनी आपल्या शेतामध्ये पारंपारिक पिकांऐवजी किंवा नेहमीच्या नगदी पीक ऐवजी खजुराची शेती केली असून हा प्रयोग यशस्वी झाला आहे.
खडसे यांना खजुराच्या शेतीतून भरघोस उत्पन्न मिळत आहे. तसेच त्यांना लाखो रुपयांचा नफा देखील होत आहे. गेल्या चाळीस वर्षांच्या राजकारणात राष्ट्रवादीचे नेते एकनाथ खडसे आपला वेगळाच ठसा उमटवला आहे. विविध आरोपांनंतर त्यांना मंत्री पद सोडावे त्यानंतर त्यांनी भाजपला सोडचिठ्ठी देत राष्ट्रवादीत प्रवेश केला होता. तरीदेखील एकनाथ खडसे सक्रिय राजकारणापासून मात्र काहीसे दूरच दिसतात. अशातच, नाथा भाऊंनी शेतात खजूर लागवडीचा अनोखा प्रयोग केला आहे. आवड म्हणून केलेला हा प्रयोग मात्र नाथा भाऊंसाठी चांगलाच फायदेशीर ठरला आहे.
आपल्या उत्पन्नाचे शेती हे एकमेव साधन असल्याचा दावा एकनाथ खडसे नेहमीच करतात. असाच काहीसा दावा खडसेंनी केला आहे. खजूर शेतीच्या माध्यमातून लाखो रुपयांचं उत्पन्न मिळणार असल्याचा दावा त्यांनी केला आहे. तसेच, शेतीमध्ये नवनवीन प्रयोग करून पैसे मिळविता येतात, असेही सांगताना खडसे यांनी त्यांच्या खजूराच्या शेतीचे उदाहरण दिले .
मुक्ताई नगरमधील त्यांच्या स्वतःच्या पंधरा एकर जमिनीमध्ये खडसे यांनी गेल्या चार वर्षांपूर्वी आखाती देशात येणाऱ्या खजूर पिकाची लागवड केली आहे. नागपूर येथे एक कृषी प्रदर्शन पाहत असताना त्या ठिकाणी खजूर पिकाची यशस्वी लागवड केल्याची माहिती एका शेतकऱ्याने त्यांना दिली होती. त्यामुळे आपणही ही खजुराची लागवड करावी, असा निर्णय त्यांनी घेतला. ज्या शेतकऱ्यांनी आतापर्यंत खजुराची लागवड केली होती. त्या शेतकऱ्यांकडून माहिती घेऊन आपण मागील चार वर्षांच्या पूर्वी खजुराची लागवड केली आहे.
विशेष म्हणजे महाराष्ट्रात याची रोपं मिळत नसल्यानं अरब देशातून अरबी खजुराची टिश्यू कल्चर रोपे मागवली. एका रोपांचा खर्च लागवड होईपर्यंत पाच हजार रुपयांपर्यंत आला. एका एकरात शंभर रोप आपण लावली आहेत. लागवड केल्यानंतर तिसऱ्या वर्षी काही प्रमाणात खजुराचे उत्पादन आले. शंभर रुपयांप्रमाणे जागेवरच ते विकले
यंदा चौथ्या वर्षी एका झाडाला साधारणतः तीस ते चाळीस किलो इतका माल एका झाडाला लागला असल्याने एक झाडाचं उत्पन्न प्रतिझाड शंभर रुपये किलोप्रमाणे विचार केला, तरी तीन हजार रुपयांपर्यंत पडतं. म्हणजेच, प्रती एकर तीन लाख रुपये आणि पंधरा एकरचा विचार केला तर पंचेचाळीस लाख रुपयांचं उत्पन्न खडसे यांना खजूर शेतीमधून मिळणार असल्याचा अंदाज व्यक्त केला जात आहे.
सर्वसामान्य शेतकऱ्याला खजूर उत्पादनातून आर्थिक फायदा घेण्यासाठी सरकारनं खजूर रोपांना सबसिडी दिली पाहिजे. बाजार पेठ उपलब्ध करून दिली पाहिजे, तरंच खजूर शेती सर्वसामान्य शेतकऱ्यांना परवडू शकेल, असं खडसे यांनी म्हटलं आहे. खजूर शेतीसोबत आपण विविध रंगाच्या बिगर बियाण्याच्या जांभूळ शेतीचाही प्रयोग यशस्वी केला आहे. आगामी काळात त्याचेही लागवड क्षेत्र वाढविणार असून सर्व सामान्य शेतकऱ्यांपर्यंत ते पोहोचविण्याचा आपला प्रयत्न राहणार असल्याचेही खडसे यांनी म्हटले आहे.
