इंडिया दर्पण ऑनलाईन डेस्क – दक्षिण आफ्रिका आणि ग्रीस या दोन देशांचा दौरा आटोपल्यानंतर पंतप्रधान नरेंद्र मोदी यांचे बंगळुरू येथील एचएएल विमानतळावर आगमन झाले. येथे पंतप्रधान मोदींनी जनतेला संबोधित करताना ‘जय विज्ञान-जय अनुसंधन’ असा नवा नारा दिला. यानंतर पंतप्रधान मोदींनी इस्रो टेलिमेट्री ट्रॅकिंग आणि कमांड नेटवर्क मिशन कंट्रोल कॉम्प्लेक्समध्ये चांद्रयान-3 मोहिमेत सहभागी असलेल्या आयएसओआर टीमच्या शास्त्रज्ञांची भेट घेतली. येथे पोहोचल्यावर पंतप्रधान मोदींनी ट्विट केले की, ‘चांद्रयान-3 च्या यशाने भारताला अभिमान वाटणाऱ्या आमच्या इस्रोच्या वैज्ञानिकांशी संवाद साधण्यासाठी उत्सुक आहोत. अंतराळ क्षेत्रातील आपल्या देशाच्या यशामागे त्यांचे समर्पण आणि उत्कटता हीच खरी प्रेरक शक्ती आहे.
चांद्रयान-3 च्या यशानंतर पंतप्रधान मोदी बेंगळुरूमध्ये इस्रोच्या शास्त्रज्ञांना संबोधित करताना भावूक झाले. यावेळी पंतप्रधान मोदींनी वैज्ञानिकांचे कौतुक करताना थोडावेळ मौन बाळगले आणि भावनांना आवर ठेऊन आपला मुद्दा पुढे केला. शास्त्रज्ञांचे कौतुक करताना पंतप्रधान मोदी म्हणाले की, तुमच्या मेहनतीला, तुमच्या संयमाला सलाम. पीएम मोदी म्हणाले की, हा आजचा भारत आहे, लढाऊ भारत आहे.
पंतप्रधान मोदी म्हणाले की, २३ ऑगस्टच्या दिवसाचा प्रत्येक सेकंद माझ्या डोळ्यांसमोर पुन्हा पुन्हा फिरत आहे. विक्रम लँडर उतरल्यावर इस्त्रो केंद्रात देशभरातील लोकांनी जल्लोष साजरा केेला, हे दृश्य कोण विसरू शकेल. काही आठवणी अजरामर होतात, ते क्षण अजरामर झाले. चांद्रयान-३ मोहीम ज्या ठिकाणी चंद्रावर उतरली होती ती जागा आता ‘शिव-शक्ती’ म्हणून ओळखली जाईल. २३ ऑगस्ट रोजी चंद्रावर भारतीय तिरंगा फडकवण्यात आला होता, त्यामुळे आजपासून हा दिवस भारतात ‘राष्ट्रीय अंतराळ दिवस’ म्हणून साजरा केला जाईल. जेव्हा प्रत्येक घरात तिरंगा असतो तेव्हा प्रत्येक हृदयात तिरंगा असतो आणि आता चंद्रावरही तिरंगा आहे. चांद्रयान-२ मोहिमेचे ठिकाण यापुढे ‘तिरंगा पॉइंट’ म्हणून ओळखले जाईल. हा तिरंगा बिंदू भारताच्या प्रत्येक प्रयत्नाची प्रेरणा बनेल, हा तिरंगा बिंदू आपल्याला शिकवेल की कोणतेही अपयश अंतिम नसते, असे ते म्हणाले.
विमानतळाबाहेर स्वागत
बंगळुरूमधील HAL विमानतळाबाहेर जमलेल्या लोकांचे पंतप्रधान मोदींनी स्वागत केले. यावेळी पंतप्रधान मोदींनी जनतेला संबोधित केले. ते म्हणाले की, जेव्हा देशाचे शास्त्रज्ञ देशाला एवढी मोठी देणगी देतात, एवढी मोठी कामगिरी करतात, तेव्हा हे दृश्य जे मी बंगळुरूमध्ये पाहतोय, तेच दृश्य मी ग्रीसमध्ये तसेच जोहान्सबर्गमध्येही पाहिले. जगाच्या कानाकोपऱ्यात, केवळ भारतीयच नाही तर विज्ञानावर विश्वास ठेवणारे, भविष्य पाहणारे, मानवतेला समर्पित असणारे लोक अशा आवेशाने आणि उत्साहाने भरलेले आहेत.
मोदी म्हणाले, की तुम्ही लोक इतक्या पहाटे इथे आलात. भारताचे भविष्य असलेली लहान मुलंही इतक्या पहाटे इथे आली आहेत. चांद्रयान-३ च्या ऐतिहासिक लँडिंगच्या वेळी मी परदेशात होतो, पण मी भारतात जाताना आधी बंगळुरूला जाण्याचा विचार केला होता. भारतात जाताच सर्वप्रथम मी शास्त्रज्ञांना नतमस्तक होईन. माझे मन वैज्ञानिकांपर्यंत पोहोचण्यासाठी खूप उत्सुक आहे, अशा भावना मोदींनी व्यक्त केल्या.
यापूर्वी पंतप्रधान मोदींच्या स्वागतासाठी स्थानिक कलाकार एचएएल विमानतळाबाहेर रस्त्यावर ढोल वाजवताना आणि नाचताना दिसले. विमानतळाबाहेर भाजपचे कार्यकर्ते आणि नेतेही मोठ्या संख्येने जमले होते. HAL विमानतळाबाहेर जमलेल्या लोकांमध्ये एका स्थानिकाने सांगितले की, चंद्राच्या दक्षिण ध्रुवावर चांद्रयान-3 उतरवणारा भारत हा जगातील पहिला देश बनला आहे. शास्त्रज्ञांना जी काही माहिती मिळेल ती भारत आणि जगासाठी एक मोठा मैलाचा दगड ठरेल. तिथून जे काही वैज्ञानिक पुरावे उपलब्ध असतील, त्याच्या मदतीने भारत संपूर्ण जगाला मदत करेल.
PM Narendra Modi Big Announcement ISRO Visit
Tiranga Point Shivshakti 23 August National Day
