नाशिक (इंडिया दर्पण वृत्तसेवा) – प्रधानमंत्री इंटर्नशिप योजनेंतर्गत, देशातील उच्च ५०० कंपन्यांमध्ये एक कोटी युवक, युवतींना इंटर्नशिपच्या संधी उपलब्ध करून दिल्या जात आहेत. या योजनेंतर्गत, युवक, युवतींना व्यावहारिक अनुभव मिळवून त्यांना उद्योग क्षेत्रात मूल्यवान एक्सपोजर मिळवून, रोजगाराच्या संधींमध्ये सुधारणा करणे हे मुख्य उद्दिष्ट आहे.
नाशिक शहरातील संधी
नाशिक शहरातील वय २१ ते २४ असलेले युवक, युवतींना या योजनेचा लाभ घेता येईल. यासाठी शैक्षणिक पात्रता म्हणून १० वी, १२ वी, ITI, पदवीधर इत्यादी असणे आवश्यक आहे. पीएम इंटर्नशिप योजनेंतर्गत, नाशिक जिल्ह्यात ७६३ इंटर्नशिप जागा उपलब्ध आहेत. इंटर्नशिपचा कालावधी १२ महिने असेल, ज्यामध्ये रु. ५,०००/- दरमहिना मानधन तसेच एकरकमी लाभ रु. ६,०००/- व विमा सुविधा देखील दिली जाईल.
अशी आहे नोंदणी प्रक्रिया
लाभार्थींनी स्वयं https://pminternship.mca.gov.in/login/ या वेबसाईटवर जाऊन, दि. ३१ मार्च २०२५ पूर्वी आपली नोंदणी करावी. नोंदणी करतांना आवश्यक कागदपत्रे अपलोड करणे आवश्यक आहे. यासाठी आवश्यक माहिती व मार्गदर्शन वरील वेबसाईटवर उपलब्ध आहे.
नाशिक महानगरपालिकेचे उपायुक्त नितीन नेर यांनी सर्व योग्य पात्र युवक/युवतींना आवाहन केले आहे की, पीएम इंटर्नशिप योजनेचा अधिकाधिक लाभ घ्या. अधिक माहिती आणि मार्गदर्शनासाठी, नाशिक महानगरपालिकेतील NULM कक्षाशी संपर्क साधावा.
