पिंपळगाव बसवंत (इंडिया दर्पण वृत्तसेवा)- पिंपळगाव बसवंत परिसरातील बाबा मंगल कार्यालयाच्या लगत रद्दीचा, पॅलेटचा कारखाना फ्रेम आणि बांबूचे दुकान आणि फरसाण गोडाऊनला भीषण आग लागली. रद्दी असल्याने क्षणातच या आगीने रौद्र अवतार घेतला व संपूर्ण परिसर जळुन खाक झाला. या आगीत अंदाजे कोट्यावधी रुपयांचे नुकसान झाले असल्याची प्राथमिक माहिती समोर येत असून नुकसानीचा आकडा वाढण्याची शक्यता आहे. याबाबत तात्काळ घटनास्थळी पिंपळगाव बसवंतचे माजी सरपंच भास्करराव बनकर, सतीश मोरे, बापूसाहेब पाटील, युवा नेते गणेश बनकर, नितीन बनकर यांनी घटनास्थळी भेट दिली तर याबाबत दिंडोरी लोकसभेचे खासदार भास्करराव भगरे यांनी देखील पिंपळगावच्या घटनेनंतर दिल्लीहून सर्व शासकीय यंत्रणेनीशी संपर्क केला.
या घटनेची सविस्तर माहिती अशी की,मुबंई महामार्ग लागत असलेल्या रद्दीचा, पॅलेटचा कारखाना, फ्रेम आणि बांबूचे दुकान छोट्या कारखान्याला शुक्रवार शॉटसर्किटने अचानक पेट घेतला. त्यानंतर काही क्षणातच या आगीने रौद्ररूप धारण केले. तातडीने पिंपळगाव अग्निशमन घटनास्थळी पोहचवले व आग आटोक्यात आणण्यासाठी प्रयत्न करू लागले. मात्र आगीचे मोठे डोम असल्याने आग विजवण्यासाठी पिंपळगाव अग्निशामक अपुरे पडत होते. त्यानंतर देवळा, निफाड, दिंडोरी, ओझर, नाशिक या ठिकाणच्या नगर परिषद आणि एचएएलची अग्निशमन जवानांनी तातडीने दाखल घेत फायरप्रूफ असलेली आधुनिक गाड्या आल्या. तरीही आग आटोक्यात येत नव्हती. शेवटी फोम युक्त पाणी सोडून तब्बल ३० ते ३५ बंब पाणी आग आटोक्यात आणण्यासाठी लागली.
महावीतरण विभागाचा गलथान कारभार
पिंपळगाव बसवंत परिसरातील एनडीसी सी कॉलनी परिसरात आणि कुरणाची आग ताजी असताना पुन्हा बाबा मंगल कार्यालय परिसरात आग लागल्याने पिंपळगाव महावीतरण विभागाच्या गलथान कारभाराची बाबा समोर येत असल्याची चर्चा सुरु झाली आहे.
तीन गॅस सिलेंडरचा झाला स्फोट…
पिंपळगाव बाबा मंगल कार्यालय जवळ तसेच बांबूंच्या दुकानाला भीषण आग लागली त्यात फरसाणचे गोडाऊन देखील जळून खाक झाले. त्यात काही गॅस सिलेंडर होते. ते जवळपास गॅस सिलेंडरचा देखील स्फोट झाला. सुदैवाने जीवित हानी झाली नाही.
आगीने धारण केले रौद्ररूप…
परिसरात मोठ्या प्रमाणात आग लागली ती आग विझवण्यासाठी अग्निशामक जवान प्रयत्न करत होते. मात्र नागरिकांनी रस्त्यात गाड्या लावून ठेवल्याने अग्निशामक कर्मचाऱ्यांच्या अग्निशामक बंप त्या ठिकाणी घेऊन जाण्यासाठी मोठी अडचण निर्माण होती. तर सर्व्हिस रोडला मोठ्या प्रमाणात नागरिकांनी रस्त्यावरच वाहने लावून आग पाहण्यासाठी गेले होते. परिणामी अग्निशामक कर्मचाऱ्यांना मोठा त्रास सहन करावा लागला. यावेळी पोलिसांनी आणि काही तरुणांनी रस्ता मोकळा करण्यासाठी मदत केल्याने आगीवर नियंत्रण आणण्यासाठी अग्निशामक कर्मचाऱ्यांना मदत झाली.
आग आटोक्यात येईना…..
पिंपळगाव बसवंत शहरातील बाबा मंगल कार्यालयाजवळ लागलेली भीषण आगीवर नियंत्रण आणण्यासाठी अग्निशामक बम कमी पडत होते. त्यामुळे जिल्ह्यातील सर्वच नगर परिषदेच्या अग्निशामक बंब त्या ठिकाणी दाखल झाले. यावेळी जवळपास दहा अग्निशामक बंब आग विझवण्यासाठी प्रयत्न करत होते. मात्र तरीही आग आटोक्यात येत नव्हती. जवळपास चार ते पाच तास आगीवर नियंत्रण आणण्यासाठी अग्निशामक जवानांना प्रयत्न करावे लागले.
नागरिकांचा जीव धोक्यात
बाबा मंगल कार्यालय तसेच परिसरात पाच ते सहा मोठे रुग्णालय आहे. हा परिसर रेसिडेंटल एरिया आहे मात्र या परिसरात असे अवैध कारखाने स्थापन करण्यात आले. याला परवानगी देण्यासाठी प्रशासनाने तेथील स्थनिक नागरिकांची परवानगी घेतली का? ही चर्चा रंगली आहे.
एक वर्षांपूर्वी गादीचा कारखाना जळून खाक……
एक वर्षांपूर्वी या ठिकाणी अवैधरित्या स्थापन केलेल्या गादीच्या कारखान्याला भीषण आग लागली होती. परिसर मोठ्या प्रमाणात आगीत खाक झाला होता. ही घटना घडूनही प्रशासनाने या परिसरात अशी अवैधरित्या असवेदनशील कारखाने तसेच व्यवसाय स्थापन करून देऊ नये. यासाठी कोणतीही भूमिका घेतली नाही. त्यामुळे पुन्हा एकदा या आगीने तांडव धारण करून हा परिसर जाळून खाक केला आहे. त्यामुळे आता तरी प्रशासनाने याकडे लक्ष देणे गरजेचे आहे.
गाडी फसली
पिंपळगाव शहरात गेल्या दोन दिवसापासून सातत्याने आग लागण्याची घटना घडत आहे. गुरुवार रोजी सायंकाळी एका गोडाऊनला आग लागली होती. मात्र त्या गोडाऊन पर्यंत गाडी घेऊन जाण्यासाठी रस्त्याला कोणतीही वाहन नसताना सदर गाडी रस्त्याच्या बाजूने फसली.
