पिंपळगाव बसवंत – शहरातील जोपूळ रोडवर जॉईंट फार्मिंग सोसायटीच्या कुरणाला शॉर्ट सर्किटमुळे आग लागल्याची घटना बुधवार दुपारी एकच्या सुमारास घडली. आगीत एक हजार गवताच्या गाठी व गवत बांधण्याचे मशीन जळून खाक झाल्याने पाच लाखांचे नुकसान झाले. तब्बल तीन तासांच्या अथक प्रयत्नाअंती आग आटोक्यात आणण्यात अग्निशमन विभागाच्या कर्मचाऱ्यांना यश आले आहे.
पिंपळगाव शहरातील जोपूळ रोडवर जॉइंट फार्मिंग सोसायटीचे गवताचे कुरण आहे. या कुरणातून गवताच्या गाठी विक्री केल्या जातात. बुधवारी दुपारी अचानक झालेल्या शॉर्ट सर्किटमुळे या गवताच्या गाठींना आग लागली. ही आग इतकी भीषण होती की आगीत जवळपास हजार गवताच्या गाठीसह मशीन जळून खाक झाले आहे. आग लागताच अवघ्या काही क्षणात घटनास्थळी पिंपळगाव व ओझर अग्निशमन दलाचे कर्मचारी दाखल होत जवळपास तीन तासांच्या अथक प्रयत्नांनंतर आगीवर नियंत्रण मिळविण्यात यश आले असले तरी आगीत जवळपास पाच लाखांचे नुकसान झाले आहे.
