इंडिया दर्पण ऑनलाईन डेस्क
भाजप नेत्या आणि मंत्री पंकजा मुंडे यांना अश्लील मेसेज पाठवून आणि कॅाल करुन त्रास देणा-या पुण्यातील अमोल काळे याला अटक करण्यात आली आहे. गेल्या काही दिवसांपासून तो पंकजा मुंडेंना कॅाल आणि मेसेजव्दारे त्रास देत होता. या प्रकरणी पंकजा मुंडे यांच्या कार्यालयाने सायबर पोलिसात तक्रार दाखल केली होती. त्यानंतर सायबर पोलिसांनी बीएनएसच्या कलम ७८ आणि ७९ तसेच आयटी कायद्याअंतर्गत गुन्हा दाखल केला.
आरोपी अमोल काळे हा बीड जिल्ह्यातील परळी येथील रहिवासी आहे. त्याला अटक केल्यानंतर न्यायालयात हजर करण्यात आले. त्यानंतर न्यायालयाने दोन दिवसांची पोलिस कोठडी सुनावली. काळे हा विद्यार्थी आहे. त्याला पोलिसांनी भोसरी येथे अटक केली. तक्रार दाखल झाल्यानंतर पोलिसांनी तपास सुरु केला व फोन करणा-याचे ठिकाण शोधले त्यानंतर काळे याला अटक झाली.
