नवी दिल्ली (इंडिया दर्पण वृत्तसेवा) – केंद्र सरकारने प्रजासत्ताक दिनाच्या पूर्वसंध्येला पद्म पुरस्कारांची घोषणा करण्यात आली आहे. एकूण १२८ जणांना पद्मश्री, पद्मविभूषण आणि पद्मभूषण पुरस्कार जाहीर करण्यात आला आहे. हेलिकॉप्टर अपघातात ठार झालेले संरक्षण दल प्रमुख जनरल बिपीन रावत यांना मरणोत्तर पद्मविभूषण तर राजकीय क्षेत्रात भरीव काम करणाऱ्या उत्तर प्रदेशच्या कल्याणसिंग यांना मरणोत्तर पद्मविभूषण पुरस्कार जाहीर करण्यात आला आहे. टाटा ग्रुपचे चंद्रशेखरन, मायक्रोसोफ्टचे सत्या नडेला आणि गुगलचे सुंदर पिचाई यांनाही पद्म पुरस्काराने सन्मानित केले जाणार आहे.
देशातील सर्वोच्च नागरी पुरस्कार असणा-या पद्म पुरस्कारांची आज घोषणा करण्यात आली. प्रतिभावंत गायिका प्रभा अत्रे यांना ‘पद्मविभूषण’ तर प्रसिध्द उद्योजक नटराजन चंद्रशेखरन आणि सायरस पुनावाला यांना ‘पद्मभूषण पुरस्कार’ जाहीर झाला.आयुर्वेदाचार्य डॉ. बालाजी तांबे यांना मरणोत्तर ‘पद्मश्री पुरस्कार’ जाहीर झाला असून त्यांच्यासह राज्यातील अन्य सहा मान्यवरांना ‘पद्मश्री पुरस्कार’ जाहीर झाले आहेत.
केंद्रीय गृहमंत्रालयाच्यावतीने दरवर्षी प्रजासत्ताक दिनाच्या पूर्व संध्येला देशातील सर्वोच्च नागरी पुरस्कार म्हणून ओळखल्या जाणा-या पद्मपुरस्कारांची घोषणा करण्यात येते. गृह मंत्रालयाकडून आज या मानाच्या पद्मपुरस्कारांची घोषणा करण्यात आली. यावर्षी एकूण ४ मान्यवरांना ‘पद्मविभूषण पुरस्कार’ जाहीर झाले असून महाराष्ट्रातून प्रतिभावंत गायिका,संगित रचनाकार,लेखिका,प्राध्यापिका आणि विदुषी प्रभा अत्रे यांना कला क्षेत्रातील उल्लेखनीय योगदानासाठी हा मानाचा पुरस्कार जाहीर झाला आहे. तसेच, प्रसिध्द उद्योजक नटराजन चंद्रशेखरन आणि सायरस पुनावाला यांना उद्योग व व्यापार क्षेत्रातील उल्लेखनीय कामगिरीसाठी ‘पद्मभूषण पुरस्कार’ जाहीर झाला आहे. देशातील एकूण १७ मान्यवरांना ‘पद्मभूषण पुरस्कार’ जाहीर झाले आहेत.
सात मान्यवरांना ‘पद्मश्री पुरस्कार’
प्रसिध्द आयुर्वेदाचार्य डॉ. बालाजी तांबे यांना वैद्यकीय क्षेत्रातील बहुमूल्य योगदानासाठी मरणोत्तर पद्मश्री पुरस्कार जाहीर झाला आहे. यासोबतच डॉ. भिमसेन सिंघल, डॉ. विजयकुमार डोंगरे आणि डॉ. हिंमतराव बावस्कर यांना वैद्यकीय क्षेत्रातील उत्कृष्ट कामगिरीसाठी पद्मश्री पुरस्कार जाहीर झाला आहे. कला क्षेत्रातील महत्वपूर्ण योगदानासाठी ज्येष्ठ लावणी गायिका व पार्श्वगीत गायिका सुलोचना चव्हाण आणि प्रसिध्द पार्श्व गायक सोनू निगम यांना पद्मश्री पुरस्कार जाहीर झाला आहे. विज्ञान व अभियांत्रिकी क्षेत्रातील उल्लेखनीय योगदानासाठी अनिलकुमार राजवंशी यांना पद्मश्री पुरस्कार जाहीर झाला आहे.
यावर्षी एकूण १२८ पद्मपुरस्कार जाहीर झाले आहेत. यामध्ये ४ ‘पद्मविभूषण’, १७ ‘पद्मभूषण’ आणि १०७ ‘पद्मश्री’ पुरस्कारांचा समावेश आहे. पुरस्कार घोषित झालेल्या मान्यवरांमध्ये ३४ महिलांचा समावेश आहे. १० अप्रवासी भारतीयांना हे मानाचे पुरस्कार जाहीर झाले असून १३ मान्यवरांना मरणोत्तर पद्म पुरस्कार जाहीर झाले आहेत .
पद्मविभूषण
बिपीन रावत – संरक्षण क्षेत्र – (मरणोत्तर)
कल्याण सिंग – राजकीय – (मरणोत्तर)
राधेशाम खेमका (मरणोत्तर)
प्रभा अत्रे – गायिका
पद्मभूषण
नटराजन चंद्रशेखरन
गुलाम नबी आझाद – राजकारण
सायरस पुनावाला – औषधनिर्माण
पद्मश्री
बालाजी तांबे – आयुर्वेद – (मरणोत्तर)
सुलोचना चव्हाण – कला
सोनू निगम – गायन
भिमसेन सिंगल
विजयकुमार डोंगरे
हिमंतराव बावसकर
अनिल राजवंशी
(पुरस्कारांची घोषणा आताच झाली आहे. त्यामुळे ही यादी अपडेट होत आहे. आपण हे पेज रिफ्रेश करावे. जेणेकरुन आपल्याला ताजे वृत्त मिळू शकेल)
