कळवण – ओतूर प्रकल्पाची आमदार नितीन पवारांकडून पाहणी

कळवण – गेल्या ४० ते ४५ वर्षांपासून कोणत्या अन कोणत्या कारणामुळे प्रलंबीत असलेल्या ओतूर ल. पा. प्रकल्प स्थळावर नव्याने नवीन प्रकल्प बांधण्यासाठी ३९ कोटी २८ लाख रुपये मंजूर करण्यात आल्यामुळे परिसराच्या आशा पल्लवीत झाल्या आहे. दरम्यान आज आमदार नितीन पवार यांनी पाटबंधारे विभागाच्या यंत्रणेसमवेत प्रकल्पस्थळावर भेट देऊन पाहणी केली.

दरम्यान नवीन प्रकल्प  बांधण्यात येणार असल्यामुळे प्रकल्पचा जुना दगडी सांडवा तोडून नव्याने सांडवा बांधण्यासाठी  प्रकल्प क्षेत्रावर विंधनविवरे घेण्याच्या कामाला सुरुवात झाली आहे त्याची आमदार पवार यांनी पाहणी करुन माहिती जाणून घेतली.

      ओतूर प्रकल्पातून मोठ्या प्रमाणात पाण्याची गळती होत असल्यामुळे  या प्रकल्पाचा पाणीसाठा दीड दोन महिन्यातच पाणी गळतीमुळे संपतो. त्यामुळे सिंचनासाठी या प्रकल्पाचा कोणत्याही प्रकारचा  उपयोग होत नाही. शासनाने या प्रकल्पाची गळती थांबविण्यासाठी दुरूस्तीचे काम हाती घेतले होते परंतु ते अर्धवट स्थितीत पडून आहे. त्यामुळे प्रकल्पाचा फायदा होत नसल्याने शेतकऱ्यांमध्ये मोठ्या प्रमाणावर असंतोष होता. आमदार नितीन पवार यांनी ओतूर प्रकल्प संदर्भात जलसंपदामंत्री जयंत पाटील यांच्या दालनात दोन बैठका घेतल्यानंतर ओतूर प्रकल्पाच्या कामाला गती आली. प्रकल्पाचा  जुना सांडवा तोडून नव्याने काँक्रिटमध्ये सांडवा बांधण्यात येणार असून नवीन प्रकल्पासाठी जुन्या प्रकल्पाचे मटेरियल न वापरता नवीन गुणवत्तेचे साधन- साहित्य वापरण्यात येणार आहे. नवीन प्रकल्प  पूर्ण लांबीत नव्याने करण्यात येणार असल्यामुळे  त्यासाठी ३९ कोटी २८ लाख रुपयांची सुधारीत प्रशासकीय मान्यता मिळाली आहे. प्रकल्पातील अवैशिष्ट कामे, शिल्लक कामे,विशेष दुरुस्ती अंतर्गत अर्थसंकल्पात विशेष दुरुस्तीसाठी ४ कोटी रुपयांची ठोक तरतूद करण्यात आल्यामुळे प्रकल्पाच्या प्राथमिक कामांना गती आली आहे. या प्रकल्पाचे उपअभियंता के एस पवार यांनी नवीन प्रकल्पाच्या प्रस्तावित कामांची माहिती आमदार नितीन पवार यांना दिली. यावेळी राष्ट्रवादी काँग्रेसचे तालुकाध्यक्ष राजेंद्र भामरे, राष्ट्रवादी युवकचे तालुकाध्यक्ष संदीप वाघ, ओतूरचे उपसरपंच मंगेश देसाई, दिगंबर पवार, देवेंद्र मोरे, अशोक मोरे, निंबा मोरे, भाऊसाहेब मोरे,दिपक अहिरे, दिपक माळी,ज्ञानेश्वर पवार आदी उपस्थित होते.