नाशिक (इंडिया दर्पण वृत्तसेवा)- २३ जून हा दिवस जागतिक ऑलिम्पिक दिवस म्हणून जगभरात साजरा केला जातो. हा दिवस उत्साहात साजरा करण्याच्या हेतूने गेल्या १६ वर्षापासून नाशिक डिस्ट्रिक्ट मल्टी गेम्स असोसिएशन, कालिका मंदिर, यशवंत व्यायाम शाळां आणि विविध क्रीडा असोसिएशन यांच्या वतीने अनेक क्रीडा उपक्रमांचे आयोजन केले जाते. उद्या दिनांक २३ जून रोजी सकाळी ८.३० वाजता क्रीडा रॅलीला सुरवात होणार आहे. काळाराम मंदिर, पंचवटी कारंजा, रविवार कारंजा, यशवंत व्यायाम शाळा, मेहेर चौक, सी. बी. एस. चौक, गडकरी चौक आणि कालिका देवी मंदिर असा या रॅलीचा मार्ग असणार आहे. काळाराम मंदिर येथे प्रमुख पाहुणे ऑलिम्पिक सुवर्णपदक प्राप्त जफर इक्बाल यांच्या हस्ते क्रीडा ज्योत प्रज्वलित करून या क्रीडा रॅलीला सुरवात करण्यात येणार आहे.
आज जफर इक्बाल यांचे नाशिकमध्ये आगमन झाले आहे. नाशिकच्या क्रीडा संघटक विंग कमांडर प्रदीप बागमार नितीन हिंगमिरे, अशोक दुधारे, आनंद खरे, राजू शिंदे, शशांक वझे यांनी पुष्पगुछ प्रदान करून त्यांचे स्वागत केले. उद्याच्या रॅलीमध्ये विविध खेळांचे १५० खेळाडू सहभागी होणार आहेत.
यावेळी नाशिक डिस्ट्रिक्ट ऑल गेम्स असोसिएशनचे अध्यक्ष राहुल देशमुख, हेमंत पांडे, चंद्रशेखर सिंग, दिपक पाटील, अशोक दुधारे, आनंद खरे, अविनाश खैरनार, राजू शिंदे आणि सर्व खेळांचे प्रमुख यांची प्रमुख उपस्थिती राहणार आहे.
यानंतर दिनांक २३ ते ३० जून या ऑलिम्पिक क्रीडा सप्ताहां अंतर्गत बास्केटबॉल, तलवारबाजी, व्हॉलीबॉल, मिनी फुटबॉल, कॅरम, टेनिस व्हॉलीबॉल, गोल्फ, टेबल टेनिस, सेपक टकरा अश्या विवीध खेळांच्या स्पर्धांचे आयोजन करण्यात आले आहे. यामध्ये बास्केटबॉल, तलवारबाजी, व्हॉलीबॉल, मिनी फुटबॉल, कॅरम, टेनिस व्हॉलीबॉल तसेच वरिष्ठ गटाच्या गोल्फ स्पर्धा आणि ३९ वर्षावरील टेबल टेनिस स्पर्धा या विविध स्पर्धांचा समावेश आहे.
नाशिकच्या क्रीडा प्रेमीनी या उपक्रमात उत्स्पूर्तपणे सहभागी व्हावे आणि हा ऑलीम्पिक सप्ताह यशस्वी करावा असे आवाहन नाशिक डिस्ट्रिक्ट ऑल गेम्स असोसिएशन, यशवंत व्यायाम शाळा, कालिका देवी मंदिर यांचे पदाधिकारी आणि विवीध खेळांचे पदाधिकारी, प्रशिक्षक यांनी केले आहे.
