इंडिया दर्पण ऑनलाईन डेस्क
नाशिक येथील करन्सी नोट प्रेसमध्ये झालेल्या भरती प्रक्रियेत काही उमेदवारांनी फसवणूक करुन डमी परीक्षार्थी बसवून बनावट कागदपत्रांच्या आधारे नोकरी मिळवल्याचा धक्कादायक प्रकार समोर आला आहे. या प्रकरणी मुंबईतील पवई पोलिस ठाण्यात सात जणांविरुध्द गुन्हा दाखल करण्यात आला आहे. हे सातही आरोपी मुळचे बिहार राज्यातील आहेत. रवी रजंन कुमार, संदीप कुमार, शिशुपाल कुमार, आयुष राज, राजीव सिंग, संदीप कुमार, आशुतोष कुमार असे या आरोपींचे नाव असून सर्व आरोपींचा शोध सुरु आहे.
करन्सी नोट प्रेसमध्ये कनिष्ठ टेक्निशियन (मुद्रण, नियंत्रण), कनिष्ठ टेक्निशियन (कार्यशाळा, इलेक्ट्रीकल) आणि पर्यवेक्षक पदांसाठी १३ मार्च २०२२ ते ४ मार्च २०२३ या कालावधीत भरती परीक्षा घेण्यात आली होती. या परीक्षेत सात जणांनी संगनमत करुन डमी परीक्षार्थींना परीक्षा केंद्रावर पाठवले. या डमी उमेदवरांनी त्यांच्या जागी परीक्षा दिली आणि उत्तीर्णही झाले.
परीक्षा पास झाल्यानंतर आरोपींनी बनावट आयटीआय प्रमाणपत्रे आणि विद्युत अभियांत्रिकीतील (इलेक्ट्रीकल) डिप्लोमाची बनावट कादपत्रे सादर करत नोकरी मिळवली. या फसवणुकीचा प्रकार नाशिकमध्ये उघडकीस आल्यानंतर हे प्रकरण झिरो एफआयआरच्या स्वरुपात मुंबईतील पवई पोलिस ठाण्यात वर्ग करण्यात आले.
