नाशिक (इंडिया दर्पण वृत्तसेवा) – शहरातील पाण्याचा अपव्यय आणि दुरुपयोग टाळण्यासाठी मनपा आयुक्त व प्रशासक मनिषा खत्री यांनी नागरिकांना आवाहन केले आहे. शहरातील कृत्रिम पाणीटंचाईवर मात करण्यासाठी त्यांनी महत्वाच्या उपाययोजना जाहीर केल्या आहेत.
उपाययोजना:
१. थेट मोटार जोडणीवर कारवाई: ज्या नळजोडणींना थेट मोटार लावून पाणी उपसले जात आहे, अशा मोटारी तत्काळ जप्त करण्यात येणार आहेत.
२. तोट्या नसलेल्या नळजोडणींचा पुरवठा बंद: ज्या नळजोडणींना तोट्या बसवलेल्या नाहीत, अशा जोडणींचा पाणीपुरवठा खंडित करण्यात येईल.
३. पाणीपट्टी वसुली: पाणी बीलांचे योग्य वाटप करून नागरिकांकडून थकित पाणीपट्टीची वसुली करण्यात येईल.
४. अपव्यय करणाऱ्यांवर कारवाई: पाण्याचा अपव्यय करणाऱ्या नागरिकांवर कडक कारवाई केली जाईल.
संयुक्त पथकाची स्थापना:
विभागीय अधिकाऱ्यांच्या नेतृत्वाखाली पाणीपुरवठा विभाग, कर विभाग आणि घनकचरा व्यवस्थापन विभागाचे कर्मचारी मिळून एक संयुक्त पथक तयार करण्यात येणार आहे. हे पथक पाण्याच्या दुरुपयोग टाळण्यासाठीच्या उपाययोजना प्रभावीपणे राबवण्यासाठी कार्यरत राहील. व या पथकांचा दैनंदिन अहवाल सर्व विभागीय अधिकारी हे आयुक्त मनिषा खत्री यांना सादर करतील
नागरिकांना आवाहन:
मनपा आयुक्तांनी नागरिकांना पाण्याचा अपव्यय टाळण्यासाठी सहकार्य करण्याचे आवाहन केले आहे. “या उपाययोजनांमुळे शहराचा पाणीपुरवठा सुरळीत होईल आणि सर्व नागरिकांना पुरेशा प्रमाणात पाणी उपलब्ध होईल, असे त्यांनी सांगितले. नाशिककरांनी या आवाहनाला सकारात्मक प्रतिसाद देत जबाबदारीने पाणी वापरण्यासाठी पुढाकार घ्यावा, असे आवाहन मनपामार्फत करण्यात आले आहे.
