विशेष प्रतिनिधी, नवी दिल्ली
भारतात लैंगिक शोषणाचा आरोप असलेल्या स्वयंघोषित स्वामी नित्यानंदने आपण भारतात पाऊल ठेवताच भारतातील कोरोना संपणार असा दावा केला आहे. त्याच्या या दाव्याचा एक व्हिडीओ व्हायरल होत असून त्यात त्याने आपल्या शरीरात देवाच्या आत्म्याने प्रवेश केला असल्याचेही म्हटले आहे. नित्यानंद हा २०१९ साली भारतातून फरार झालेला आरोपी आहे. त्यानंतर तो इक्वेडोरच्या एका बेटावर गेला तेथेच कैलासा हा स्वयंघोषित स्वंतत्र देशच तयार केला. पण, त्याला अजूनही संयुक्त राष्ट्रसंघाने मान्यता दिलेली नाही. नित्यानंदने त्यासाठी बरेच प्रयत्न केले. येथेच त्याने २०२० मध्ये स्वत:च्या मालकीची रिझर्व्ह बँक अॅाफ कैलासाची स्थापना केली. इतक्यावरच न थांबता त्याने कैलाशियन डॅालरचीही घोषणा केली.
अशा या नित्यानंदने आता अजब दावा करुन पुन्हा सर्वांचे लक्ष वेधले आहे. त्याचा हा व्हायरल झालेला व्हिडिओ कोणत्या तारखेचा हे कळत नसले तरी तो अलीकडचा असल्याचे बोलले जात आहे. या व्हिडिओमध्ये नित्यानंदचा एक शिष्य त्याला विचारतो की भारतातून कोरोनाची महामारी केव्हा संपणार. त्यावर नित्यानंद सांगतो की, आता आपल्या शरीरात देवाच्या आत्म्याने प्रवेश केला आहे. भारतात माझे पाऊल पडताच भारतातील कोरोना संपेल.
