इंडिया दर्पण ऑनलाईन डेस्क
कळवणचे राष्ट्रवादी काँग्रेस अजित पवार गटाचे आमदार नितीन पवार यांच्या विरुध्द अभोणा पोलिस स्टेशन येथे ग्रामसेवकाच्या पत्नीच्या भावाने तक्रार दाखल केल्यामुळे खळबळ निर्माण झाली आहे. आमदार नितीन पवार व त्यांच्या पत्नी जयश्री पवार या कोणत्या ना कोणत्या कारणाने खोट्या तक्रारी करुन ग्रामसेवक असलेल्या पतीस त्रास देतात. म्हणून काँग्रेसच्या पदाधिकारी असलेल्या शीतल महाजन या महिलेने विषारी औषध सेवन करुन आत्महत्या करण्याचा प्रयत्न केला. त्यानंतर महाजन यांचे बंधून योगेश गायकवाड यांनी यासंदर्भात तक्रार केली आहे.
आत्महत्या करण्यापूर्वी या महिलेने चिठ्ठी लिहून ठेवली. त्यात आमदार नितीन पवार व जयश्री पवार यांच्या विरोधात काम केल्यामुळे ग्रामसेवक पती रामराव महाजन यांच्या विरोधात खोट्या तक्रारी करुन अटकविण्याचा प्रयत्न केला जात असल्याचे म्हटले आहे. अनेकवेळा चौकशी होऊनही तक्रारीत तथ्य आढळलेले नाही. तरीही जाणीपूर्वक त्रास सुरुच असल्याचे म्हटले आहे.
विशेष म्हणजे नुकत्याच विधीमंडळाच्या अधिवेशनात आमदार नितीन पवार यांनी विधानसभेत लक्षवेधी उपस्थित करत ग्रामसेवक रामराव महाजन यांच्यावर कारवाईची मागणी केली होती. त्यानंतर ही घटना घडली आहे.
