निफाड – मंगळवार पहाटे दीड वाजेच्या सुमारास शहरातील उगाव रोडवरील शॉपिंग सेंटरला आग लागून ९ दुकाने भस्मसात झाली. या अग्नितांडवामध्ये एक कोटी तीस लाख रुपयांचे नुकसान झाले आहे. याबाबत मिळालेल्या माहितीनुसार निफाड शहरातील उगावरोड या वर्दळीच्या रस्त्यावरील ठाकरे शॉपिंग सेंटर मधील व्यापारी गाळ्यांना पहाटे एक ते दीड वाजेच्या सुमारास आग लागली. बंद असलेल्या दुकानांमधून धूर येत असल्याचे जवळच्याच एका हॉटेल कामगाराच्या लक्षात येताच त्याने आरडाओरड करून नागरिकांना आग लागल्याची माहिती दिली. उपस्थित नागरिकांनी ही आग विझवण्यासाठी शर्थीचे प्रयत्न केले.
निफाड नगरपंचायतीचा पाण्याचा टँकर, पिंपळगांव बसवंत आणि नाशिक येथील अग्निशमन दलाच्या जवानांनी ही आग विझवण्याचा प्रयत्न केला. या आगीत नवीनच व्यवसाय सुरु झालेल्या व्यवसायिकांचे मोठ्या प्रमाणात नुकसान झाले असून एकूण ९ दुकाने आगीच्या भक्ष्यस्थानी पडली आहेत. या अग्नितांडवामध्ये सीताराम गायकवाड यांचे सनिज मेन्स पार्लर, सोहेब शेख यांचे कापड दुकान, राजेंद्र खैरे यांचे ईश्वरी ऑटो सेंटर, सौ. रुपाली निफाडे यांचे समृद्धी ट्रेडर्स, विजय निफाडे यांचे वसुंधरा हार्डवेअर, आरिफ अन्सारी यांचे महाराष्ट्र ट्रेडर्स, विकास कसबे यांचे श्री साई दूध संकलन केंद्र, सचिन ढेपले यांचे मल्हार खानावळ, संतोष सोळसे यांचे सोळसे इलेक्ट्रिकल्स यांचा समावेश आहे.
घटनास्थळी निफाडचे तहसीलदार शरद घोरपडे, निफाड नगरपंचायतीच्या मुख्याधिकारी डॉ. श्रीया देवचके यांनी घटनास्थळी भेट देऊन घटनेची माहिती घेतली. महसूल खात्याचे मंडळ अधिकारी बाळासाहेब निफाडे व तलाठी खंडांगळे यांनी नुकसानीचा पंचनामा केला. निफाड शहरामध्ये आग विझवण्यासाठी यंत्रणा उपलब्ध नसल्याने तसेच बाहेरून अग्निशमन दलाचे वाहने येण्यास उशीर झाल्याने आगीची दाहकता जाणवली. निफाड शहरात तातडीने अग्निशमन यंत्रणा उभारण्यात यावी अशी मागणी नागरिकांकडून करण्यात येत आहे.
