नाशिक (इंडिया दर्पण वृत्तसेवा)- महाराष्ट्र औद्योगिक विकास महामंडळाच्या (MIDC) प्रादेशिक अधिकाऱ्याची नियुक्ती रखडल्याने नाशिकमधील उद्योजकांचे प्रश्न दिवसेंदिवस वाढत आहेत. विविध शासकीय परवानग्या, भूखंड वाटप, पायाभूत सुविधा व विकास, प्रदूषण नियंत्रण, तसेच नवीन गुंतवणुकीसाठी लागणारी प्रक्रिया यासारख्या महत्त्वाच्या बाबी अधिकाऱ्याअभावी खोळंबल्या आहेत. त्यामुळे MIDC ने हा प्रश्न त्वरित सोडवून नाशिकला प्रादेशिक अधिकारी नियुक्त करावा, अशी ठाम मागणी नाशिक इंडस्ट्रीज अँड मॅन्युफॅक्चरर्स असोसिएशन (NIMA) चे नूतन अध्यक्ष आशिष नहार यांनी केली आहे.
नाशिक MIDC चे मागील प्रादेशिक अधिकारी नितीन गवळी यांची बदली झाल्यानंतर महेंद्र साळी यांच्याकडे ही जबाबदारी सोपवण्यात आली होती. मात्र, त्यांची सेवानिवृत्ती झाल्याने हे पद सध्या प्रभारी श्री जयवंत पवार यांच्याकडे आहे. मॅटमध्ये सदर प्रकरण गेल्यानंतर त्यावर निर्णय सुद्धा झालेला आहे. प्रादेशिक अधिकाऱ्यांची नियुक्ती एमआयडीसीने करावी असा मॅट ने आदेश दिलेला आहे. यानंतरही नवीन नियुक्तीसाठी प्रक्रियेत अडथळे आले असून, परिणामी, महत्वाच्या फाइल्स आणि प्रकल्प रखडले आहेत.
नाशिक MIDC हा राज्यातील एक महत्त्वाचा औद्योगिक क्षेत्र आहे. येथे लघु, मध्यम आणि मोठ्या उद्योगांचे जाळे विस्तारलेले आहे. मात्र, प्रादेशिक अधिकाऱ्याच्या अभावामुळे औद्योगिक भूखंडांशी संबंधित तक्रारी, पाणी व वीजपुरवठा, रस्ते आणि इतर पायाभूत सुविधांचे प्रश्न सुटत नाहीत. यामुळे अनेक नवे गुंतवणूकदार नाशिककडे पाठ फिरवण्याची शक्यता आहे, असे आशिष नहार यांनी स्पष्ट केले.
सध्या उद्योजकांच्या अडचणी सोडवण्यासाठी MIDC च्या उपमुख्य कार्यकारी अधिकारी सोनाली मुळे यांची नाशिकसाठी नियुक्ती करण्यात आली आहे. त्या आठवड्यातून एक दिवस नाशिकला भेट देतात आणि उद्योजकांच्या समस्या ऐकून घेतात. मात्र, “हे केवळ तात्पुरते समाधान आहे. नाशिकसारख्या मोठ्या औद्योगिक केंद्राला कायमस्वरूपी आणि पूर्णवेळ प्रादेशिक अधिकारी असणे आवश्यक आहे,” असे आशिष नहार यांनी ठामपणे सांगितले.
नाशिक MIDC मधील उद्योजक, व्यापारी संघटना आणि गुंतवणूकदार या प्रश्नावर नाराज आहेत. अनेक तक्रारी प्रलंबित असल्याने कामांमध्ये मोठा विलंब होत आहे. “जर हा प्रश्न तातडीने सोडवला नाही, तर उद्योजकांना संघटित व्हावे लागेल,” असा इशाराही नहार यांनी दिला आहे.
नाशिकच्या औद्योगिक क्षेत्राच्या वाढीसाठी आणि नवीन गुंतवणुकीसाठी MIDC प्रशासनाने वेगाने निर्णय घ्यावा आणि प्रादेशिक अधिकाऱ्याची नियुक्ती त्वरित करावी, अशी मागणी नहार यांनी केली आहे. “नाशिकचा औद्योगिक विकास थांबता कामा नये, त्यामुळे हा प्रश्न लवकरात लवकर मार्गी लागणे गरजेचे आहे,” असेही त्यांनी स्पष्ट केले.
