नवीन संकट! कोरोनातून बरे झालेल्यांना आता याचा धोका

विशेष प्रतिनिधी, नवी दिल्ली

कोरोना प्रादुर्भावातून बरे झाल्यानंतर रुग्णांना काळी बुरशी तसेच इतर त्रासांना सामोरे जावे लागले आहे. त्यातून मुक्त होत नाही तोच, आता त्यात आणखी एका आजाराची भर पडली आहे. दिल्लीतील सर गंगाराम रुग्णालयात सायटोमेगालो विषाणूचे (सीएमव्ही) रुग्ण आढळल्याचा खुलासा केला आहे. देशातील पहिले पाच रुग्ण याच रुग्णालयात दाखल झालेले आहेत. कोरोनाचा उपचार घेतल्यानंतर रुग्णांना पोटात दुखणे आणि शौचातून रक्त जाण्याच्या त्रासामुळे पुन्हा दाखल करावे लागले आहे. पैकी एका रुग्णाचा मृत्यूही झालेला आहे.

कोरोना संसर्गामुळे ज्या रुग्णांची प्रतिकारक शक्ती कमी आहे, त्यांच्यात काळी बुरशीचे अनेक प्रकरणे पाहण्यात आली आहेत. आता प्रतिकारक शक्ती कमी असलेल्या रुग्णांना सीएमव्हीचा संसर्ग झाल्याचेही आढळले आहे. सीएमव्हीचा संसर्ग का होतोय त्याची कारणे अद्याप स्पष्ट झालेली नाहीत, असे डॉक्टर सांगतात.

रुग्णालयातील डॉ. अनिल अरोरा सांगतात, कोरोनाच्या दुसर्या लाटेदरम्यान बाधित रुग्णांमध्ये सीएमव्हीचे रुग्ण अचानक वाढू लागले आहेत. गेल्या ४५ दिवसांत हे रुग्ण आढळले आहेत.

उपाचारानंतर २० ते ३० दिवसांनंतर रुग्णांच्या पोटात दुखणे आणि शौचातून रक्त वाहण्याचे प्रकार दिसून आले आहेत. वैद्यकीय संशोधन पाहिल्यास देशात अशी प्रकरणे अद्याप आढळलेले नाहीत. प्रथमच असे रुग्ण आढळले आहेत. हे रुग्ण दिल्ली आणि जवळच्या राज्यांमध्ये आढळले आहेत.

रोगप्रतिकारक शक्तीची कमतरता

ते सांगतात, बुरशीप्रमाणेच यामध्येसुद्धा स्टेरॉइडयुक्त औषधांचा अतिवापर कारणीभूत असू शकतो. अशी औषधे रोगप्रतिकारक शक्तीला दाबून ठेवते. परिणामी असामान्य संसर्गांसाठी अतिसंवेदनशील ठरत आहे. सायटोमेगालो विषाणू ८० ते ९० टक्के भारतीय लोकसंख्येत आढळतो. मात्र तो त्रासदायक नसतो. आपली रोगप्रतिकारक शक्ती भक्कम असल्यामुळे वैद्यकीय दृष्टीने हा विषाणू खूपच क्षीण असतो.

अँटिव्हायरल थेरेपीद्वारे उपचार यशस्वी

सर गंगाराम रुग्णालयात दाखल पाच रुग्णांचे वय ३० ते ७० वर्षांमधील आहे. यापैकी चार रुग्णांमध्ये शौचातून रक्त येण्याचा त्रास झाला आहे. तर एका रुग्णाला आतड्यांमध्ये अडथळे येत असल्याची समस्या आहे. रक्त जास्त प्रमाणात वाहिल्याने दोन रुग्णांची प्रकृती गंभीर असल्याचे डॉक्टरांनी सांगितले आहे. एका रुग्णाच्या उजव्या बाजूला शस्त्रक्रिया करण्याची त्वरित गरज होती. तर दुसर्या रुग्णाचा मृत्यू झाला आहे. परंतु चार पैकी तीन रुग्णांना अँटिव्हायरल थेरेपीद्वारे यशस्वी उपचार करण्यात आले आहेत.