नवी दिल्ली (इंडिया दर्पण वृत्तसेवा) – श्रद्धा खून प्रकरणासारखी आणखी एक घटना दिल्लीत समोर आली आहे. गीता कॉलनी उड्डाणपुलाजवळ एका महिलेचा मृतदेह सापडला आहे. मृतदेहाचे अनेक तुकडे झाल्याचे सांगण्यात येत आहे. माहिती मिळताच पोलीस पोहोचले असून तपासात गुंतले आहेत. सध्या या महिलेची ओळख पटलेली नाही.
मिळालेल्या माहितीनुसार, दोन वेगवेगळ्या ठिकाणी मृतदेहाचे अवशेष सापडले आहेत. मृतदेहाचे अनेक तुकडे मिळाल्यानंतर दिल्ली पोलिसांनी तपास सुरू केला आहे. फॉरेन्सिक टीम घटनास्थळी पोहोचली आहे. संपूर्ण परिसराची नाकेबंदी करून शोध मोहीम सुरू करण्यात आली आहे. उड्डाणपुलाजवळ मानवी शरीराचे काही अवयव पडून असल्याची माहिती आज सकाळी ९.१५ वाजता पोलिसांना मिळाली. त्यानंतर पोलीस तेथे पोहोचले. महिलेची ओळख अद्याप पटलेली नाही. महिलेचे वय ३५ ते ४० वर्षे असल्याचे सांगण्यात येत आहे.
सेंट्रल रेंजचे जॉईंट सीपी परमादित्य यांनी सांगितले की, दोन काळ्या पॉलिथिनच्या पिशव्या सापडल्या आहेत. एका पॉलिथिनमध्ये कापलेले डोके आणि दुसऱ्यामध्ये शरीराचे इतर भाग ठेवले होते. लांब केसांच्या आधारे आपण असे गृहीत धरतो की ते स्त्रीचे शरीर आहे. त्याची ओळख अद्याप पटलेली नाही, तपास सुरू आहे.
यापूर्वी श्रद्धा हत्याकांडाने संपूर्ण देश हादरला. श्रद्धाची हत्या तिच्या प्रियकर आफताबने केल्याचा आरोप आहे. त्यानंतर आफताबने श्रद्धाच्या मृतदेहाचे तुकडे केले होते. आफताबने श्रद्धाच्या मृतदेहाचे तुकडे मेहरौलीच्या जंगलासह दिल्ली-एनसीआरच्या अनेक भागात फेकले. श्रद्धाच्या वडिलांनी तिच्या बेपत्ता झाल्याची तक्रार दाखल केल्यानंतर ही बाब उघडकीस आली. तब्बल सहा महिन्यांनी श्रद्धाची हत्या प्रकरण उघडकीस आले. त्यानंतर पोलिसांनी आरोपीला अटक केली.
