मुंबई (इंडिया दर्पण वृत्तसेवा) – राष्ट्रवादी अजित पवार गटात सध्या इनकमिंग सुरु झाले आहे. आज दोन विद्यमान आमदार व दोन माजी खासदारांनी पक्षात प्रवेश केला. याअगोदर शरद पवार गटात मोठी इनकमिंग सुरु होती. पण, आता उमेदवारी अर्ज भरण्यासाठी अवघे काही दिवस शिल्लक असतांना अनेक जण अजित पवार गटात प्रवेश करत आहे.
प्रवेश करणा-यांमध्ये माजी खासदार प्रतापराव चिखलीकर, संजयकाका पाटील यांच्यासह राष्ट्रवादी काँग्रेस पक्षाचे दिवंगत नेते बाबा सिद्दिकी यांचे सुपुत्र आमदार झिशान सिद्दिकी व वरुड मोर्शीचे अपक्ष आमदार देवेंद्र भुयार यांचा समावेश आहे. इस्लामपूरचे नेते निशिकांत भोसले पाटील यांची सुध्दा इंन्ट्री झाली आहे. या सर्वांना विधानसभेची उमेदवारी सुध्दा देण्यात आली.
इस्लामपूर येथून निशिकांत पाटील, तासगाव विधानसभा मतदार संघातून संजयकाका पाटील, लोहा विधानसभा मतदार संघातून प्रताप पाटील चिखलीकर, वांद्रे पूर्व मधून झिशान सिद्दिकी यांना उमेदवारी देण्यात आली आहे. तर वरुड मोर्शी अपक्ष आमदार देवेंद्र भुयार यांनाही संधी देण्यात आली आहे.
यावेळी अजित पवार म्हणाले की, आगामी विधानसभा निवडणुकीत त्यांची भक्कम साथ लाभेल, याची खात्री आहे. त्यांचं मी मनापासून स्वागत करतो आणि शुभेच्छा दिल्या. यावेळी ते सिद्दिकी बाबत बोलतांना म्हणाले की, पक्ष प्रवेशाचा कार्यक्रम पार पडला. आपल्या वडिलांचा लोकसेवेचा, समाजसेवेचा वारसा झिशान हे नेटानं पुढे नेतील, असा विश्वास असल्याचे सांगितले.
