नाशिक – नाशिक येथील ऐतिहासिक देवस्थान असलेल्या श्री नवशा गणपती मंदीर ट्रस्टचा वाद मिटवण्यासाठी धर्मदाय सह आयुक्त जयसिंग झपाटे यांनी कणखर भूमिका घेऊन तेरा विश्वस्तांची नियुक्ती केल्याची चर्चा आहे. न्यायालयात सर्व गटांनी त्यास संमती दिल्याचे बोलले जात आहे. दरम्यान याबाबतचा अधिकृत निकाल अद्याप हाती आलेला नाही.
याबाबतची अधिक माहिती अशी की, नाशिक शहरातील जागृत व ऐतिहासिक देवस्थान असलेल्या श्री नवशा गणपती मंदिराच्या ट्रस्ट नोंदणी पासून वादाला सुरुवात झाली होती. नोंदणीनंतर केलेली घटना ही वादात आली होती. यामुळे सुमारे पंधरा वर्षापासून ट्रस्टचेचे कामकाज वादात अडकले होते. या ना त्या कारणामुळे वाद निर्माण होत असल्याने ट्रस्टचा विकास खुंटला होता. देवस्थानच्या जागेचे मालक व ट्रस्टी मंडळातील वाद धर्मदाय आयुक्तालय प्रलंबित होता. या प्रकरणात आयुक्त झपाटे यांनी सर्व पक्षांना समान संधी देत आपले म्हणणे मांडण्याचे आदेश दिले होते. तसेच वाद मिटवून देवस्थानचा विकास करण्याकडे लक्ष देण्याचे आवाहन केले होते. या प्रकरणाची सुनावणी आज आयुक्तांसमोर झाली. जागामालक यांचे चार प्रतिनिधी तर परिसरातील नऊ असे विश्वस्त मंडळ नियुक्त करून यातून तोडगा काढण्यात आल्याचे बोलले जात आहे.
