नाशिक (इंडिया दर्पण वृत्तसेवा)- जिल्हा परिषद नाशिकमधील अधिकारी व कर्मचाऱ्यांना त्यांच्या दैनंदिन कामकाजात कृत्रिम बुद्धिमत्ता (AI) तंत्रज्ञानाचा प्रभावी वापर करता यावा, यासाठी जिल्हा परिषदेच्या मुख्य कार्यकारी अधिकारी आशिमा मित्तल यांच्या संकल्पनेतून जिल्हा परिषदेत विशेष AI प्रशिक्षण कार्यशाळेचे आयोजन करण्यात आले. या प्रशिक्षणात जिल्हा परिषदेचे विभागप्रमुख, गटविकास अधिकारी आणि प्रत्येक विभागातून दोन अधिकारी व कर्मचारी यांनी सहभाग घेतला.
AI तंत्रज्ञानाचा प्रशासनिक कामकाजात अधिक चांगल्या प्रकारे उपयोग कसा करता येईल, याबाबत कॉग्नीडॉल्फ प्रायव्हेट लिमिटेडचे मयूर तांबे व क्लाउडटेल्स लिमिटेडचे स्वप्नील बावा यांनी यांनी उपस्थित अधिकाऱ्यांना व कर्मचाऱ्यांना मार्गदर्शन केले. प्रशिक्षणादरम्यान विविध AI ॲप्लिकेशन्सचा वापर, त्यांच्या कार्यप्रणाली आणि प्रत्यक्ष अमलात आणण्याच्या तंत्रांची माहिती देण्यात आली. यामुळे अधिकाऱ्यांना डिजिटल कार्यक्षमता वाढवण्यास मदत होणार आहे.
कार्यक्रमाच्या प्रारंभी, जिल्हा परिषदेच्या मुख्य कार्यकारी अधिकारी आशिमा मित्तल यांनी आगामी काळातील AI तंत्रज्ञानाच्या महत्त्वावर प्रकाश टाकत प्रत्येक विभागातील तंत्रस्नेही अधिकारी व कर्मचाऱ्यांना या आधुनिक तंत्रज्ञानाचे ज्ञान मिळावे, यासाठी हे प्रशिक्षण उपयुक्त ठरेल, असे सांगितले. याचबरोबर, प्रशिक्षित अधिकारी आणि कर्मचारी भविष्यात जिल्हा स्तरावरील तसेच पंचायत समिती स्तरावरील इतर अधिकारी व कर्मचाऱ्यांना प्रशिक्षण देतील, यामुळे जिल्हा परिषद प्रशासन अधिक आधुनिक आणि परिणामकारक होईल, असेही त्यांनी नमूद केले.
जिल्हा परिषदेच्या या उपक्रमामुळे प्रशासनात नव्या तंत्रज्ञानाचा समावेश होऊन अधिकाऱ्यांची कार्यक्षमता वाढेल तसेच नागरिकांना अधिक जलद आणि प्रभावी सेवा देता येईल. AI चा वापर करून नोंदणी प्रक्रिया, अहवाल निर्मिती अन्य महत्त्वाच्या प्रशासकीय प्रक्रियांमध्ये गती येईल.
मुख्य कार्यकारी अधिकारी आशिमा मित्तल यांच्या संकल्पनेतून घेण्यात आलेला हा प्रशिक्षण कार्यक्रम जिल्हा परिषदेच्या डिजिटल परिवर्तनाच्या दिशेने एक महत्त्वाचा टप्पा असून, भविष्यात अधिकाधिक अधिकारी व कर्मचारी यांना प्रशिक्षण देण्यात येणार असल्याची माहिती सामान्य प्रशासन विभागाचे उपमुख्य कार्यकारी अधिकारी रवींद्र परदेशी यांनी दिली. यावेळी मुख्य लेखा व वित्त अधिकारी मारुती मुळे, उपमुख्य कार्यकारी अधिकारी ग्रापमंचायत वर्षा फडोळ, कार्यकारी अभियंता संदीप सोनवणे, पंकज मेतकर, जिल्हा जलसंधारण अधिकारी वैशाली ठाकरे, महिला व बालविकास विभागाचे जिल्हा कार्यक्रम अधिकारी प्रताप पाटील, जिल्हा आरोग्य अधिकारी डॉ. सुधाकर मोरे, शिक्षणाधिकारी डॉ. नितीन बच्छाव, कृषी विकास अधिकारी संजय शेवाळे उप कार्यकारी अभियंता अजित सूर्यवंशी, यांच्यासह सर्व पंचायत समितीचे गट विकास अधिकारी व मुख्यालयातील कर्मचारी उपस्थित होते.
