नाशिक जिल्हा परिषदेला यशवंतराव चव्हाण पंचायतराज अभियानांतर्गत विभागीय प्रथम पुरस्कार…ही पंचायत समिती विभागात तिसरी

मुंबई (इंडिया दर्पण वृत्तसेवा)- राज्यस्तरीय “यशवंतराव चव्हाण पंचायतराज अभियान २०२३-२४” अंतर्गत विभागस्तरावरील अत्युकृष्ट कामकाजासाठी जिल्हा परिषद नाशिकला विभागीय प्रथम क्रमांकाचा प्रतिष्ठेचा पुरस्कार प्रदान करण्यात आला आहे. मुंबई येथील यशवंतराव चव्हाण सेंटर येथे पार पडलेल्या पुरस्कार वितरण सोहळ्यात मा. ग्रामविकास व पंचायत राज मंत्री ना. जयकुमार गोरे यांच्या हस्ते हा पुरस्कार प्रदान करण्यात आला. जिल्हा परिषदेच्या वतीने प्रभारी मुख्य कार्यकारी अधिकारी प्रतिभा संगमनेरे आणि उपमुख्य कार्यकारी अधिकारी (सामान्य प्रशासन) रवींद्र परदेशी यांनी हा पुरस्कार स्वीकारला.

कळवण पंचायत समितीने यशवंत पंचायतराज अभियान सन 2023 24 अंतर्गत उत्कृष्ट कामगिरी करत नाशिक महसुली विभागात तृतीय क्रमांक मिळवला यावेळी मा. ग्रामविकास व पंचायत राज मंत्री ना. जयकुमार गोरे यांच्या हस्ते तत्कालीन गट विकास अधिकारी निलेश पाटील, गटvविकास अधिकारी रमेश वाघ व सहाय्यक गट विकास अधिकारी वंदना सोनवणे यांनी हा पुरस्कार स्विकारला.

जिल्हा परिषदेच्या मुख्य कार्यकारी अधिकारी आशिमा मित्तल व अतिरिक्त मुख्य कार्यकारी अधिकारी डॉ. अर्जुन गुंडे, यांच्या मार्गदर्शनाखाली नाशिक जिल्हा परिषदेला सभा कामकाज, कर्मचारी व्यवस्थापन, तक्रार निवारण, सेवा हमी कायद्याची प्रभावी अंमलबजावणी, भरती प्रक्रिया, माहिती अधिकार अधिनियमांतर्गत प्रकरणांचा जलद निपटारा, अतितीव्र (SAM) व तीव्र (MAM) कुपोषित बालकांचे श्रेणीवर्धन, कुटुंब नियोजन शस्त्रक्रिया, बालकांचे लसीकरण तसेच भौतिक विकासाची कामे या विविध क्षेत्रांमध्ये उल्लेखनीय कामगिरी केल्याबद्दल राज्यात प्रथम क्रमांक मिळाला आहे.

या अभियानांतर्गत ग्रामीण प्रशासनात पारदर्शकता, गतीशीलता आणि नाविन्यपूर्ण उपक्रमांवर भर देण्यात आला. जिल्हा परिषद नाशिकने या सर्व निकषांवर प्रभावी अंमलबजावणी करत विभागीय स्तरावर आघाडी घेतली. प्रशासनातील डिजिटायझेशन, ई ऑफिसचा प्रभावी वापर, ग्रामपंचायत स्तरावर प्रशिक्षण आणि लोकसहभागाच्या माध्यमातून विविध उपक्रम राबवले असून या यशात सर्व विभागप्रमुख, अधिकारी व कर्मचारी वर्गाचे योगदान मोलाचे असल्याचे प्रभारी मुख्य कार्यकारी अधिकारी प्रतिभा संगमनेरे यांनी सांगितले, भविष्यातही नाशिक जिल्हा परिषद प्रशासनाच्या प्रत्येक पातळीवर उत्कृष्ट कार्याच्या दिशेने पुढे जाण्यास कटिबद्ध असल्याचे यावेळी त्यांनी नमूद केले.

उत्कृष्ट अधिकारी व कर्मचारी यांचा देखील सन्मान :
सन 2022 – 23
सचिन पवार, ग्रामपंचायत अधिकारी, ग्रामपंचायत दरी ता. नाशिक
भालचंद्र विठ्ठल तरवारे, ग्रामपंचायत अधिकारी, ग्रामपंचायत बेहेड, ता. निफाड

सन 2023 – 24
डॉ.भगवान ताडगे, सहाय्यक पशुधन अधिकारी, पशुवैद्यकीय दवाखाना गिरनारे, पंचायत समिती नाशिक
सुनील ठाकरे, कनिष्ठ सहायक, पंचायत समिती चांदवड