औरंगाबाद (इंडिया दर्पण वृत्तसेवा) – येथे खेळल्या गेलेल्या दोन दिवसीय कसोटी सामन्यात, नाशिक ने परभणी संघाविरुद्ध १ डाव व २४४ धावांनी दणदणीत विजय मिळविला. महाराष्ट्र क्रिकेट असोसिएशनच्या वरिष्ठ राज्यस्तरीय आमंत्रितांच्या क्रिकेट स्पर्धेतील (एमसीए सिनियर इन्विटेशन) लीग हे यश मोठे आहे. पहिल्या दिवशी नाणेफेक जिंकून प्रथम फलंदाजी करणार्‍या परभणी ला , नाशिकच्या गोलंदाजांनी २५ व्या षटकात केवळ ५९ धावात गुंडाळले. मुर्तुझा ट्रंकवाला ने ५ बळी घेत गोलंदाजीत चमक दाखविली.
उत्तरादाखल नाशिक च्या सलामीवीर यासर शेख च्या जोरदार नाबाद २०० ( ५ षटकार व २७ चौकार ) , कुणाल कोठावदे १२७ ( ७ षटकार व १३ चौकार ) तसेच मुर्तुझा ट्रंकवाला फटकेबाज ४९ ( ४ षटकार व ५ चौकार ) व धनंजय ठाकुर नाबाद ३२ , या आक्रमक फलंदाजीच्या जोरावर , षटकामागे ७.६१ च्या सरासरीने केवळ ५७ षटके खेळुन ३ बाद ४३४ ह्या प्रचंड धावसंख्ये वर पहिला डाव घोषित केला . नंतर नाशिकच्या गोलंदाजांनी परभणी चा दुसरा डाव ३२ व्या षटकात १३१ धावांत संपवून, दुसर्‍या दिवशी उपहारापूर्वीच १ डाव व २४४ धावांनी दणदणीत विजय मिळविला . तन्मय शिरोडे ने दोन्ही डावात ३/३ बळी घेतले. या प्रचंड विजया बद्दल नाशिक जिल्हा क्रिकेट संघटनेचे चेअरमन विनोद शहा, सचिव समीर रकटे यांनी नाशिक जिल्हा क्रिकेट संघ व प्रशिक्षकांचे अभिनंदन केले आहे.
संक्षिप्त धावफलक व निकाल असा:
परभणी –
नाणेफेक जिंकून प्रथम फलंदाजी – पहिला डाव – सर्वबाद ५९ ( २४.१ षटके ) – मुर्तुझा ट्रंकवाला ५ , तन्मय शिरोडे ३ तर प्रतीक तिवारी २ बळी.
नाशिक –
पहिला डाव – ३ बाद ४३४ डाव घोषित ( ५७ षटके ) – यासर शेख नाबाद २०० , कुणाल कोठावदे १२७, मुर्तुझा ट्रंकवाला ४९, धनंजय ठाकुर नाबाद ३२.
परभणी –
दुसरा डाव – सर्वबाद ( ३१.३ षटके ) – शुभम कटारे ४४, सौरभ शिंदे ३०. तन्मय शिरोडे व मुर्तुझा ट्रंकवाला प्रत्येकी ३ तर तेजस पवार व ऋतुराज ठाकरे प्रत्येकी २ बळी.
निकाल – नाशिक १ डाव व २४४ धावांनी विजयी .
