पुणे (इंडिया दर्पण वृत्तसेवा) – शहरातील वडारवाडी भागातील एका खासगी वसतिगृहात एका विद्यार्थ्याने आत्महत्या केली आहे. ओम नीलेश कापडणे (वय २०, मूळ राहणार नाशिक) असे मृत विद्यार्थ्याचे नाव आहे. तो फर्ग्युसन महाविद्यालयात बीएससीच्या तृतीय वर्षात शिक्षण घेत होता. ओम हा गुरुवारी सायंकाळी मृतावस्थेत आढळून आला.
ओम हा मूळचा नाशिकचा रहिवासी आहे. येथे तो सध्या मॉडेल कॉलनी परिसरातील खासगी वसतिगृहात राहत होता. पोलिसांनी सांगितले की, ओमने गुरुवारी संध्याकाळी वसतिगृहात आत्महत्या केली. घटनेची माहिती मिळताच पुणे शहर पोलिसांचे पथक घटनास्थळी दाखल झाले. पोलिसांनी मृतदेह पोस्टमॉर्टमसाठी रुग्णालयात नेला. ओमने आत्महत्या का केली हे अद्याप स्पष्ट झालेले नाही. ओमच्या खोलीमध्ये किंवा त्याच्या कपड्यांमध्ये कोणतीही सुसाइड नोट सापडलेली नाही. त्याने टोकाचे पाऊल का उचलले हे शोधण्यासाठी पोलिसांनी तपास सुरू केला आहे. दरम्यान, याप्रकरणी चतुःश्रृंगी पोलिस ठाण्यात अकस्मात मृत्यूची नोंद करण्यात आली आहे.
