नाशिक (इंडिया दर्पण वृत्तसेवा) – सिन्नर तालुक्यात चार ते पाच वेळेस ऊस जळाल्याची घटना ताजी असतानाच इगतपुरी तालुक्यातील घोटी खुर्द शिवारात अशीच घटना घडली आहे. विद्युत शॉर्टसर्किटमुळे सुमारे पाच एकर ऊस जळाल्याने शेतकऱ्यांमध्ये तीव्र संतापाचे वातावरण आहे. वीज वितरणच्या कारभाराने शेतकऱ्याचे लाखोंचे नसून तात्काळ नुकसान भरपाई देण्याची मागणी संबंधित शेतकऱ्यासह घोटी येथील ग्रामस्थांनी केली आहे.
शेतकरी रामनाथ शिंदे यांनी वर्षभरापूर्वी घोटी खु. शिवारातील दारणा धरणालगतच्या आपल्या शेत गट नंबर 165, 166, 168, 172(1) (2) मध्ये 7 एकर उसाची लागवड केली होती. वर्षभर काबाडकष्ट करत उसाला जगवण्यासाठी त्यांनी रात्र-रात्र पिकाला पाणी दिले होते. अशात काही दिवसांपासून ऊसही तोडणीला आला होता. मात्र, संगमनेर व अकोला येथील साखर कारखान्याचे ऊसतोड कामगारांकडून ऊसतोडही केली जात नव्हती. अशात रामनाथ शिंदे यांनी कारखान्याला निवेदन देत लवकरात-लवकर ऊसतोड करण्याची मागणी केली होती. पुढील 2-3 दिवसांत ऊसतोड होणार असल्याने तेही समाधानी होते. मात्र, अशात आज (दि. 12) रोजी दुपारच्या सुमारास त्यांच्या शेतातून गेलेल्या वीज वाहक तारांमध्ये हवेने घर्षण होऊन ठिणग्या पडल्याने उसाला आग लागली. अशात हवेचा वेगही अधिक असल्याने क्षणार्धात आगीने रौद्ररूप धारण केले.
परिसरातील शेतकऱ्यांनी आगीचे लोळ बघताच शिंदे यांना याबाबत माहिती दिली. शिंदे यांनी तात्काळ शेताकडे धाव घेत आग विझवण्याचा प्रयत्न केला. मात्र, आगीने व्यापक रूप धारण केल्याने शेतकऱ्याच्या डोळ्यासमोर त्यांचा तब्बल 5 एकर ऊस जळून खाक झाला. शेतातून गेलेल्या वीजतारांमध्ये मोठ्या प्रमाणावर झोळ पडल्याने थोड्याश्या हवेमुळे या तारा एकमेकांना खेटत असतात. अनेकवेळा वीज वितरणला याबाबत माहिती देऊनही त्यांच्याकडून कुठलिही दखल न घेतल्याने आज झालेल्या हा घटनेत त्यांचे लाखोंचे नुकसान झाले आहे. महावितरणच्या भोंगळ कारभाराचा फटका बसल्याची तीव्र भावना शेतकरी शिंदे यांनी व्यक्त केली आहे. शासनाने त्वरित दखल घेत नुकसानभरपाई मिळवून देण्याची मागणी त्यांच्यासह परिसरातील शेतकऱ्यांनी केली आहे. विद्युत शॉर्ट सर्किटमुळे आणि ठिकाणे आलेली पिके जळल्या ची घटना अनेक ठिकाणी घडत आहे शेतकऱ्याच्या हाती तोंडाशी आलेला घास हिरावून गेल्याची घटना नाशिक जिल्ह्यातील अनेक ठिकाणी घडलेली आहे शेतकरी वर्ग हा असे वारंवार घटना घडत असल्याने हवालदिल झालेला असून आत्तापर्यंत अनेक लाखोचे नुकसान झाले शेतकरी वर्गाचे म्हणणे आहे.
बघा खालील व्हिडिओ
