नाशिक (इंडिया दर्पण वृत्तसेवा) – नाशिकच्या ईश्वरी सावकारची १९ वर्षांखालील इंडिया ए संघाच्या उपकर्णधारपदी निवड झाली आहे. १९ वर्षांखालील भारतीय क्रिकेट नियामक मंडळ – बीसीसीआय आयोजित महिला टी-ट्वेंटी सामन्यांच्या चॅलेंजर ट्रॉफी साठी सदर निवड झाली आहे.
ईश्वरीला १९ वर्षांखालील बीसीसीआय स्पर्धेतील सातत्यपूर्ण फलंदाजीची ताबडतोब पावती मिळाली . भारतीय क्रिकेट नियामक मंडळ – बीसीसीआय आयोजित , चंदिगड येथे झालेल्या १९ वर्षांखालील महिला टी-ट्वेंटी सामन्यांच्या स्पर्धेत नाशिक जिल्हा क्रिकेट असोसिएशनच्या ईश्वरी सावकारने १९ वर्षांखालील महाराष्ट्र संघाच्या कर्णधारपदी निवड सार्थ ठरवत कर्णधार व सलामीची उकृष्ट फलंदाज म्हणून चांगली छाप पाडली. स्पर्धेतील पाच पैकी तीन सामने महाराष्ट्र संघाने जिंकले . सलामीवीर म्हणून पाचही सामन्यांत ईश्वरी सावकारने अतिशय सातत्यपूर्ण कामगिरी करताना महाराष्ट्र संघाच्या धावसंख्येत वेळोवेळी मोठा वाटा उचलला.
ईश्वरीची कामगिरी
मिझोराम विरुद्ध ४० ,केरळ ४१ , वडोदरा ४६, मणिपूर ३९ व हरयाणा विरुद्ध २७. या स्पर्धेत महाराष्ट्राकडून सर्वाधिक धावा केल्या तर संपूर्ण भारतात तिसरे स्थान मिळवले. या बीसीसीआय स्पर्धेतील सातत्यपूर्ण फलंदाजी मुळे सुरत येथे झालेल्या भारतीय क्रिकेट नियामक मंडळ – बीसीसीआय आयोजित , वरिष्ठ महिला टी-ट्वेंटी सामन्यांच्या स्पर्धेसाठी वरिष्ठ महिला महाराष्ट्र क्रिकेट संघात निवड झाली . ईश्वरीने या वरीष्ठ स्पर्धेत नाबाद 46 या सर्वोच्च धावसंख्येसह 5 सामन्यात 42 च्या सरासरीने महाराष्ट्र संघातर्फे सर्वाधिक 125 धावा केल्या.
ईश्वरीच्या ह्या महत्वपूर्ण निवडी बद्दल नाशिकच्या क्रिकेटविश्वात आनंदमय वातावरण निर्माण झाले असून, नाशिक जिल्हा क्रिकेट संघटनेचे चेअरमन विनोद शहा, सचिव समीर रकटे , पदाधिकारी , सदस्य व प्रशिक्षक यांनी ईश्वरी सावकारचे अभिनंदन करून भविष्यातील उत्तम कामगिरीसाठी शुभेच्छा दिल्या आहेत.
Nashik Ishwari Sawkar Selection BCCI Women Team
