नाशिक (इंडिया दर्पण वृत्तसेवा) – राज्य शासनाने मुलींसाठी सुरू केलेली सैनिकी सेवापूर्व प्रशिक्षण संस्था ही देशासाठी आदर्शवत ठरेल, असा विश्वास मुख्यमंत्री एकनाथ शिंदे यांनी व्यक्त केला आहे. येथील सैनिकी सेवापूर्व प्रशिक्षण संस्थेच्या उद्घाटन प्रसंगी मुख्यमंत्री श्री. शिंदे बोलत होते.
यावेळी व्यापीठावर उपमुख्यमंत्री अजित पवार, राज्याचे अन्न, नागरी पुरवठा व ग्राहक संरक्षण मंत्री छगन भुजबळ, ग्रामविकास मंत्री गिरिश महाजन, उद्योगमंत्री उदय सामंत, सार्वजनिक बांधकाम (सार्वजनिक उपक्रम) मंत्री तथा जिल्ह्याचे पालकमंत्री दादाजी भुसे, खासदार हेमंत गोडसे, आमदार नरेंद्र दराडे, जिल्हाधिकारी गंगाथरन डी., महाराष्ट्र आरोग्य विज्ञान विद्यापीठाच्या कुलगुरू डॉ. माधुरी कानीटकर, जिल्हा परिषदेच्या मुख्य कार्यकारी अधिकारी आशिमा मित्तल, जिल्हा सैनिक कल्याण अधिकारी लेफ्टनंट कमांडर ओंकार कापले, अर्जून पुरस्कार प्राप्त खेळाडू कविता राऊत, संस्थेच्या संचालिका मेजर (निवृत्त) सईदा फिरासत आदि मान्यवर उपस्थित होते.
मुख्यमंत्री श्री. शिंदे म्हणाले, सैनिकी सेवापूर्व प्रशिक्षण संस्थेच्या उद्घाटनचा कार्यक्रम एक आगळावेगळा कार्यक्रम आहे याचा मला मनस्वी आनंद होत आहे. महाराष्ट्रात मुलींसाठी अशा प्रकारची संस्था सुरू होणे ही गौरवास्पद बाब आहे. जिल्ह्याचे पालकमंत्री दादाजी भुसे यांच्या प्रयत्नातून व पाठपुराव्यातून आज ही सैनिकी प्रशिक्षण संस्था उभी राहीली आहे. असे त्यांनी यावेळी सांगितले. या संस्थेच्या माध्यमातून मुली देशसेवेसाठी सैन्यात दाखल होऊन अधिकारी पदापर्यंत पोहचण्याची संधी त्यांना प्राप्त होणार आहे. या मुलींना दर्जेदार सैनिकी प्रशिक्षण अनुषंगिक सेवासुविधा प्राप्त होण्यासाठी शासनाकडून निधीची कमतरता भासणार नाही. या संस्थेच्या मागे शासन खंबीरपणे उभे राहील. असेही मुख्यमंत्री श्री. शिंदे यांनी योवळी सांगितले. यावेळी मुख्यमंत्र्यांनी सैनिकी स्कूलच्या मुलींशी मनमोकळा संवाद साधला.
दर्जेदार शिक्षणातून ध्येयपूर्ती साध्य होते : उपमुख्यमंत्री अजित पवार
उपमुख्यमंत्री अजित पवार आपल्या मनोगतात म्हणाले, दर्जेदार शिक्षणातून आपली ध्येयपूर्ती सिद्ध करण्यासाठी या संस्थेतून नक्कीच वाव मिळेल यात शंका नाही. आज मुली कोणत्याही क्षेत्रात मागे नाही. देशभक्तीची भावना मनात ठेवून मुलींनी या संस्थेत प्रवेश घेतला आहे ही बाब सर्वांसाठी अभिमानास्पद आहे. महाराष्ट्राला स्त्रीशक्तीचा वारसा लाभला आहे. हाच वारसा या मुली पुढे घेवून जातील यात शंका नाही. कोणत्याही क्षेत्रात शैक्षणिक गुणवत्ता असेल तर यशप्राप्ती नक्कीच होते. जिल्हा नियोजन समितीच्या माध्यमातून संस्थेला सर्वोतोपरी मदत उपलब्ध करून दिली जाईल असे श्री. पवार यांनी यावेळी सांगितले.
यावेळी राज्याचे सार्वजनिक बांधकाम मंत्री (सार्वजनिक उपक्रम) दादाजी भुसे आपल्या मनोगतात म्हणाले, राष्ट्रीय संरक्षण प्रबोधिनीमध्ये मुलींना प्रवेश देण्यासाठी नाशिक येथे देशातील पहिली मुलींची सैनिकपूर्व प्रशिक्षण संस्था सुरू झाली आहे, ही राज्यासाठी अभिमानाची बाब असल्याचे त्यांनी सांगितले.
संस्थेच्या संचालिका मेजर (निवृत्त) सईदा फिरासत कार्यक्रमाच्या प्रास्ताविकात म्हणाल्या, मुलींच्या सैनिकी सेवापूर्व प्रशिक्षण संस्थेत प्रवेशासाठी महाराष्ट्रातून 4 हजार अर्ज प्राप्त झाले होते. त्यातून लेखी परिक्षेतून 150 मुलींच्या मुलाखतीतून अंतिम 30 मुलींची निवड झाली आहे. त्या मुली आज या संस्थेत प्रशिक्षण घेत असल्याची माहिती त्यांनी यावेळी दिली. कार्यक्रमाला माजी सैनिक, नागरिक मोठ्या संख्येने उपस्थित होते.
