नाशिक (इंडिया दर्पण वृत्तसेवा) – भरधाव दुचाकी झाडावर आदळल्याने दोघे परप्रांतीय मित्र ठार झाले. हा अपघात गंगापूररोडवरील जेहान सर्कल भागात झाला. या अपघातात एक जण जखमी झाला असून मृतांसह जखमी हॉटेलमधील कामगार आहेत. याप्रकरणी गंगापूर पोलिस ठाण्यात अपघाताची नोंद करण्यात आली असून, या घटनेने भररस्त्यातील झाडी अजून किती बळी घेतील असा प्रश्न उपस्थित होत आहे.
गंगापूर पोलिसांनी दिलेल्या माहितीनुसार, भरत जसबिर रोकया उर्फ क्षत्रिय (१९) व पंकज रावत (२६ ) अशी अपघातात ठार झालेल्या दोघांची नावे असून या अपघातात जतीन हेमराज क्षत्रिय (१९ रा.अदित्य अपा.जेहान सर्कल) हा जखमी झाला आहे. दोघे क्षत्रिय व रावत हे तिघे मित्र मुळचे नेपाळ येथील रहिवासी असून ते गंगापूररोड भागातील अंडा ग्राम कॅफे या हॉटेलमधील वेटर आहेत. शनिवारी (दि.१८) पहाटेच्या सुमारास तिघे मित्र हॉटेलचे काम आटोपून आपल्या घराकडे दुचाकीवर (एमएच १५ इजी ७९७७) परतत असतांना हा अपघात झाला.
आनंदवलीकडून जेहान सर्कलच्या दिशेने तिघे मित्र ट्रिपलसिट प्रवास करीत असतांना सावरकरनगर येथील भोसला मिल्ट्री स्कूल भागातील भररस्त्यात असलेल्या झाडावर भरधाव दुचाकी धडकली. चालकाचा आपल्या वाहनावरील ताबा सुटल्याने हा अपघात झाला. या अपघातात तिघे मित्र गंभीर जखमी झाले होते. हॉटेल मालक कार्तिक उगले यांनी तिघांना तातडीने जिल्हारूग्णालयात दाखल केले असता भरत क्षेत्रिय यास वैद्यकीय सुत्रांनी तपासून मृत घोषीत केले तर पंकज रावत याचा सायंकाळी उपचारादरम्यान मृत्यू झाला. तिसऱ्या जखमीवर उपचार सुरू असून अधिक तपास उपनिरीक्षक भिसे करीत आहेत.
Nashik Gangapur road accident 2 death 1 injured
