सुरगाणा (इंडिया दर्पण वृत्तसेवा) – तालुक्यातील सूर्यगड येथे एक धक्कादायक प्रकार घडला आहे. सख्ख्या साडूने कुऱ्हाडीने हल्ला करून साडूची हत्या करुन मेव्हणी व पत्नीला गंभीर जखमी केले. या धक्कादायक घटनेमुळे गावासह तालुक्यात खळबळ निर्माण झाली आहे. या प्रकरणात सुर्यगड येथील माजी सरपंच मनोहर राऊत यांचा मृत्यू झाला आहे. या घटनेतील आरोपी भास्कर पवार याला पोलिसांनी अटक केली आहे.
बुधवारी पहाटे साडेचार वाजता ही घटना घडली. या घटनेत साडू असलेल्या भास्कर पवार याने माजी सरपंच मनोहर राऊत यांच्या मानेवर घाव घालून जागीच ठार केले. त्यानंतर मेव्हणी भारती राऊत व पत्नी मंदा पवार यांच्यावरही वार करून जखमी केले. ही घटना घडत असतांना आरडाओरडा ऐकून संशयित आरोपीचा मुलगा सुरेश याने धाव घेतली. त्यानंतर त्याने वडीलांना पकडून पोलिसांच्या ताब्यात दिले. या घटनेत पवार यांची जखमी पत्नी व मेव्हणीवर जिल्हा शासकीय रुग्णालयात उपचार सुरू आहे. पोलीस अधिक तपास करीत आहे..
या कारणातून वाद
पायरपाड येथे राहणारा भास्कर पवार हा चुलता त्रास देतो म्हणून सहा महिन्यापासून मनोहर राऊत यांच्याकडे राहत होता. पण, हातरुंडी येथील मामा प्रकाश महाले यांनी भास्कर पवार यांना त्यांच्या मुळगावी पाठवण्याचा निरोप दिला. हा निरोप मनोहर राऊत यांनी भास्कर पवार याला दिल्यानंतर त्याचा राग अनावर झाला व त्यातून ही घटना घडली.
surgana news
Nashik District Rural Surgana Crime Murder
