नाशिक (इंडिया दर्पण वृत्तसेवा) – ऊसाच्या फडात खेळतांना ट्रॅक्टरच्या चाकाखाली सापडून दोन वर्षीय चिमुरडीचा करूणअंत झाल्याची घटना औरंगाबाद रोडवरील माडसांगवी ते नांदूरनाका दरम्यानच्या एका शेतात घडली. ऊसतोड कामगारांची ती मुलगी असून, याप्रकरणी आडगाव पोलिस ठाण्यात ट्रॅक्टर चालक भाऊराव लक्ष्मण घुलूम (रा.पवार मळा औरंगाबाद रोड) याच्याविरुद्ध विरोधात गुन्हा दाखल करण्यात आला आहे.
पोलिसांनी दिलेल्या माहिती नुसार जागृती प्रेमचंद जाधव (रा.तपोवन) असे मृत बालिकेचे नाव आहे. शहर परिसरात ऊसतोडीची लगभग सुरू असून, राज्यभरातील कामगारांच्या टोळ्या ठिकठिकाणी कोपी करून वास्तव्यास आहेत. मुळचे नागदताडा ता. कन्नड येथील प्रेमचंद जाधव हे कुटूंबियासह तपोवन भागात आपल्या टोळीसमवेत राहतात. औरंगाबाद रोडवरील माडसांगवी शिवारात या टोळीच्या मुखीयासह सर्व कामगार शुक्रवारी (दि.१७) ऊसतोडणीसाठी गेले असता ही घटना घडली.
बाबासाहेब तिडके याच्या शेतात कामगार आपल्या कामात मग्न असतांना त्यांची मुले फडात खेळत बागडत होती. सायंकाळच्या सुमारास सर्व कामगार आपल्या हातातील काम आटोपून घराकडे परण्याच्या गर्दीत असतांना फडात बागडणारी जागृती ऊस भरण्यासाठी भरधाव येणाऱ्या ट्रॅक्टरच्या पुढील चाकाखाली आली. या घटनेत चाक अंगावरून गेल्याने तिचा चिरडून मृत्यू झाला. वडिल प्रेमचंद जाधव यांच्यासह अन्य कामगारांनी तिला तात्काळ जिल्हारूग्णालयात दाखल केले मात्र उपचारापूर्वी वैद्यकीय सुत्रांनी तिला मृत घोषीत केले. या घटनेने सर्वत्र हळहळ व्यक्त होत असून अधिक तपास आडगावचे उपनिरीक्षक पाथरे करीत आहेत.
Nashik Crime Tractor Accident Girl Child Killed
