नाशिक (इंडिया दर्पण वृत्तसेवा)- शेअर मार्केट मधील गुंतवणुकीवर भरघोस नफ्याचे आमिष दाखवून लाखोंना गंडा घालणा-या छत्रपती संभाजीनगर येथील दोघांना ग्रामिण पोलीसांनी बेड्या ठोकल्या. याबरोबरच गोल्डन अवर सायबर मदत संकल्पनेतून टेलीग्राम टास्क फ्रॉडची ९ लाख ८० हजाराची रक्कम मुळ मालकास परत मिळवून देण्यास सायबर शाखेस यश आले आहे.
प्रमोद दत्तात्रेय गुळे (रा.टूनकीरोड शिऊर ता.वैजापूर जि.छत्रपती संभाजीनगर) व नयन युवराज वाघचौरे (रा.प्रतापगड नगर,सिडको जि. छत्रपती संभाजीनगर) अशी अटक करण्यात आलेल्या संशयितांची नावे आहेत. याबाबत मालेगाव येथील गुंतवणुदाराने फिर्याद दिली होती. संशयितानी तक्रारदाराशी संपर्क साधला होता. शेअर्स मार्केट मधील गुंतवणुकीवर भरघोस नफा मिळवून देण्याचे आमिश दाखविले होते. तक्रारदाराचा विश्वास संपादन करीत ही फसवणुक केली. अनोळखी नंबरवरून संपर्क साधत तक्रारदारास एसबीआय सिक्युरिटी यांचे वतीने शेअर्स मार्केट मध्ये कशाप्रकारे गुंतवणुक करायची याबाबत माहिती देण्यात आली. व्हॉटसअप ग्रुपमध्ये अ‍ॅड करीत त्यांना लिंक पाठविण्यात आली. या लिंकच्या माध्यमातून एक अ‍ॅप डाऊनलोड झाले असता संशयितांनी या अ‍ॅप्लीकेशनमधून तक्रारदारास गुंतवणुक करण्यास भाग पाडले. तब्बल ३० लाख ५८ हजार ९१६ रूपयांची गुंतवणुक केलेली असतांना तक्रारदार यांच्या बँक खात्यात ९५ लाख ९ हजार २५८ रूपये जमा असल्याचे आढळून आल्याने त्यांनी रक्कम काढण्याचा प्रयत्न केला असता फसवणुकीचा हा प्रकार समोर आला.
सायबर भामट्यांनी नफ्याच्या रकमेवर २० टक्के रक्कम इन्कम टॅक्स करीता आमच्याकडे जमा करा असा सल्ला दिल्याने तक्रारदाराने बँकेत जावून चौकशी केली असता फसवणुकीचा भांडाफोड झाला. तक्रारदाराने तात्काळ ग्रामिण पोलीसांचे सायबर शाखा गाठल्याने याप्रकरणी फसवणुकीसह आयटीअ‍ॅक्टनुसार गुन्हा दाखल करण्यात आला होता. अधिक्षक बाळासाहेब पाटील व अप्पर अधिक्षक आदित्य मिरखेलकर यांच्या मार्गदर्शनाखाली सायबरचे निरीक्षक नागेश मोहिते, उफनिरीक्षक दिगंबर थोरात,हवालदार प्रमोद जाधव, पोलीस नाईक परिक्षीत निकम,अंमलदार तुषार खालकर,सुनिल धोक्रट,विशाल चौधरी, हवालदार हेमंत गिलबिले व प्रदिप बहिरम आदींच्या पथकाने आरोपी निष्पन्न करून दोघांना छत्रपती संभाजीनगर येथे बेड्या ठोकल्या असून, त्याच्या ताब्यातून तीन लाखाची रक्कम तक्रारदारास मिळवून दिली आहे. तर पिपळगाव ब. येथील भावेश शांतीलाल धाडीवाल या व्यापा-यास सायबर भामट्यांनी गेल्या १० जुलै रोजी टेलीग्राम वरील अ‍ॅमेझोन ८ जी या ग्रुपमध्ये अ‍ॅड करून प्रॉडक्ट प्रमोशन केल्यास कॅश बॅक मिळेल असे आमिष दाखविले होते. या प्रकरणात धाडीवाल यांना तब्बल १६ लाख ७८ हजार रूपयांची रक्कम वेगवेगळया बॅक खात्यात भरण्यास भाग पाडण्यात आले होते. आर्थिक फसवणुक झाल्याचे लक्षात येताच धाडीवाल यांनी ग्रामिण पोलीसांच्या सायबर शाखेत धाव घेतली होती. पोलीसांनी तात्काळ ऑनलाईन तक्रार दाखल करून घेत तक्रारदारांची फसवणुक झालेल्या रकमेपैकी ९ लाख ८० हजार रूपयांची रक्कम गोठविली होती. कोर्टाच्या आदेशान्वये ही रक्कम परत मिळवून देण्यास यश आले आहे.
